Más d’una ventena d’eventos musicales pa pasar esti avientu
Avientu acaba llegar y xunto a él el cutu y les ganes de quedar en casa folgando. Sicasí, l’axenda del mes aporta con más d’una ventena de razones pa poner calcetu gordu y salir a disfrutar de la música’l país. Festivales gastronómico-musicales, espectáculos, conciertos por aniversarios, la continuación de xires… son dalgunos de los eventos nos que va poder disfrutase de música folk, punk, rock, bandines, canción d’autor o pa tola familia.
El calendariu arranca’l viernes 2 d’avientu col conciertu de Xiranda Brass Band, onde pue sentise a la Banda Gaites Xiranda nun nuevu espectáculu nel que s’entemez la música tradicional con otros estilos más averaos al jazz. Esi mesmu día en Llangréu arranca’l festival Su Excelencia La Fabada que va llevar al Nuevu Teatru y al Parque Dolores F. Duro actuaciones de bandes de gaites y bandines: Banda de Gaites de Llangréu, Gaiteros del Carbón, Los Gascones, Bandina Gaites Trisquel, La Garrapiella, L’Enguedeyu y la Bandina Aires del Nalón van poner son a esta Fiesta d’Interés Turísticu Rexonal que dura hasta’l 11 d’avientu,
El sábadu 3 los amantes de la música asturiana van tener que dividise pa dir sentir a Cantaruxare en Llanes, ver a Mapi Quintana en Xixón o dir al festival Trebeyando. El tríu de pandereteros formáu por Pau Santirso, Ramsés Ilesies y Xosé Antón Ambás va tar amenizando la Esbilla en Llacín, mientres que Mapi estrena en La Llaboral el so espectáculu Música pa tornar páxaros, que llevó al Intercélticu de Lorient, y onde va poder sentise repertoriu de tradición oral iguáu pa una formación jazzística y armonizáu pa llevalo a estilos más modernos. Per otru llau, la novena edición del festival Trebeyando axunta a les xeneraciones más nueves del folclor asturianu.
El domingu 4 toca pasar al sector audiovisual pa disfrutar, a les 18.30h nel Teatru Riera de Villaviciosa, del espectáculu NÓS, una collaboración ente la Banda Gaites Ribeseya y el cineasta Pablo Casanueva, onde pue vese proyecciones que cunten la historia de la banda intercalaes cola actuación d’esta mesma, con una formación pensada expreso pa esti proyectu. Tamién el Teatru Prendes de Candás va acoyer les actuaciones d’Anabel Santiago y los Gaiteros de Carbón a les 12 del mediudía.
El próximu fin de selmana vuelve a ser un cruce de caminos pa los melómanos. El xueves 8 calienten l’ambiente L-R, Silvia Quesada y Alfredo González na cai Mayor de Cangas del Narcea a les 13.30. En Xixón toquen el día 9 Nacho Vegas, Silvia Quesada y Alfredo González na Sala Albéniz pa cellebrar el 30 aniversaciu del míticu Bar Plaza de Cimavilla con too un festival del indie, pop y la canción d’autor. Mientres que’l sábadu los adeptos al punk-folk podrán averase al Bad Step Kaos Fest, n’Avilés, onde van sentir a Ochobre y Skontra compartiendo escenariu. Pa completar esi segundu fin de selmana, Slum Suit zarra’l domingu 11 con un conciertu nel Teatru Vital Aza, en L.lena, nel qu’interpreten el so espectátulu Siguiendo’l Camín d’Iturralde.
Gaita, pandereta y rock n’ast
El día 17 va de gaites: va poder disfrutase de la Celso Díaz Band en Siero y de Berto Varillas & Asturiana Mining company en Salas. La Matazuga participa’l día 21 nel circuitu d’actividades de cultura tradicional asturiana, con un espectáculu de Carlos Alba Cellero nel que tien un importante papel la música de tradición oral. El folk continúa coles pandereteres Algaire que van tocar el día 23 na Capiya Los Dolores de Grau. Per último, la música pa tola familia d’Alicia Álvarez en compañía de David Varela va sonar en Llaviana (miércoles 28) y Dixebra‘l vienres 30 en Xixón zarra la primer parte de la xira cola que cellebren el so 35 aniversariu y la publicación del so trabayu nuevu Ente la niebla.
