Bimenes celebra un añu más la Fiesta de la Oficialidá de la Llingua Asturiana. Esti fin de selmana Martimporra va acoyer la XXVIII edición d’esti eventu nel que va haber asturianada, música y baille tradicional, y los conciertos de 6 Riales y Skama la Rede. La programación completa puede consultase equí. Nella va poder esfrutase tamién de talleres y xuegos tradicionales, pasucáis y xuntances populares.
L’eventu entama esti vienres 5 de xunetu a les 20h nel prau del Palaciu de Casa Estrada con un Certame de Tonada y Canción Asturiana a cargu d’Alicia Villanueva, Carlos Velasco, Anabel Santiago, Néstor Díaz, el gaiteru Valentín Fuente y el Coriquín El Corriellu la Pandorga.
La folixa sigue’l sábadu 6 de xunetu depués de les intervenciones institucionales y del pregón del periodista Enrique Carballeira Melendi. A les 13h ta prevista una Danza de la Oficialidá na Plaza de la Casa Conceyu de Martimporra y un pasucáis del Grupu Folklóricu Los Yerbatos, el Grupo de Danzas de Riotuerto y los Pauliteiros de Miranda do Douro. A les 13.30h treslládase l’actividá al prau del Palaciu de Casa Estrada con una amuesa de baille tradicional.
Conciertos
La tarde del sábadu entama a les 16h cola actuación de la Bandina La Llume. La programación fina colos conciertos de 6 Riales -22h- y Skama la Rede -23.30h-, y una folixa post-oficialidá nel mesmu prau.
Suscríbite a les nuestres novedaes
