La Conseyería de Cultura, Política Llingüística y Turismu ta acabante d’anunciar la creación del Premiu Obdulia Álvarez La Busdonga d’Asturianada col enfotu de fomentar, protexer y esparder el xéneru de l’asturianada depués de la so declaración como Bien d’Interes Cultural en 2015, amás de contribuyir a la promoción y normalización del asturianu como llingua vehicular de la canción tradicional. Les bases que regulen el premiu tán en períodu d’alegaciones hasta’l 27 de xunetu y puen consultase equí.
La participación va organizase en trés categoríes: femenina, masculina -dotaes con 6.000€– y moza –3.000€-. Pa inscribise va ser indispensable tener algamao ún de los seis primeros puestos en certámenes llocales d’asturianada que cuenten con apoyu institucional y contemplen les trés modalidaes del premiu. El concursu va organizase en dos fases estructuraes en trés gales semifinales y una gala final con seis cantadores.
Namás van poder interpretase melodíes del repertoriu tradicional, magar van almitise cantares de nueva composición siempres que cumplan coles carauterístiques estilístiques del xéneru y les lletres seyan íntegramente n’asturianu. Los trés formatos posibles van ser les asturianaes a solo, con acompañamientu de gaita y con acompañamientu de percusión -nel casu de les vaqueires-. Los criterios a valorar van ser de conducta y actitú escénica, entonación y afinación, calidá vocal, ornamentación y matización, dificultá y variedá d’estilos -ayeranes, vaqueires, soberanes o de nueva creación- y calidá llingüística.
Suscríbite a les nuestres novedaes
