Los aviones de la ruta Osaka-Abu Dhabi y Abu Dhabi-Madrid del pasáu 12 d’ochobre llevaben un escesu d’equipaxe bultable. Nun namás en kilos, tamién n’esperiences musicales, personales y vivencies de la representación de la Banda de Gaites Villa de Xixón n’Osaka, Xapón.
A mediaos de mayu, la banda xixonesa recibe una llamada de la Conseyería de Turismu del Principáu d’Asturies. El Pabellón d’España de la Expo Internacional d’Osaka tien una selmana dedicada a Asturies y la Conseyería piensa nuna representación de música y gastronomía p’averar la nuestra cultura al país nipón. En gastronomía, el restaurante uvieín Casa Fermín foi l’escoyíu, y na parte musical, la Conseyería decídese pola Banda Gaites Villa de Xixón. Ehí entama un viaxe con turbulencies, sorpreses y un resultáu muncho meyor de lo esperao.
El primer problema de la banda de gaites foi de lloxística, namás seis de los treinta componentes que formen la banda pueden participar. Les tormentes d’idees sucederíense pa poder aportar y aprovechar al máximo la oportunidá d’esti viaxe. La decisión de la banda foi enfocar les sos actuaciones en trés estayes distintes: bandina tradicional con música dedicada al baille pa les actuaciones a pie de cai; banda de gaites pa los actos oficiales y, la guinda del pastel, la collaboración con músicos llocales nun espectáculu de mestura de música asturiana, banda gaites y big band de jazz.
«Hubo trés formatos: bandina tradicional con música pal baille; banda de gaites pa los actos oficiales y la collaboración con músicos xaponeses nun espectáculu de mestura de banda gaites y big band de jazz»
El pabellón d’España de la Expo foi ún de los más reconocíos pola so guapura estética. El so diseñu basáu na naturaleza y les corrientes de Kuroshio, descubiertes pol vascu Andrés d’Urdaneta en 1565, facíen que les sos escaleres azules llevantáranse penriba d’un horizonte y un sol, onde podíen vese conciertos, charres y videos representativos, como l’homenaxe al Gernika.
La Banda de Gaites Villa de Xixón, aprovechaba tol potencial d’eses escaleres. Les actuaciones de bandina tradicional –cuatro pases de media hora al día-, entamaben na parte d’arriba del pabellón. Los visitantes qu’esperaben les interminables coles d’entrada disfrutaben de les “melodíes allegres” como solíen deci-yos a los músicos y interesábense mesmo polos instrumentos como polos traxes. Según pasaba’l set, los xixoneses baxaben les escaleres p’acabar cerca del públicu qu’esperaba ensin perder detalle de la so música.
«Nun momentu, la entrada del pabellón convertíase nuna folixa improvisada, con una filera de más de 40 persones. Al acabar los trenta minutos del set, llegaba’l momentu de photocall, más coles y coles pa facer semeyes cola banda, entrugar dudes de les gaites y d’Asturies»
Dempués de pasodobles, xotes, muñeires, seguíes con palmes y aplausos pol públicu xaponés, llegaba la parte final. Villa de Xixón preparó dos canciones xaponeses pa tener un detallín col so públicu. La primera yera ‘Kojo no Tsuki’, compuesta por Rentaro Taki a finales del sieglu XIX, una melodía tranquila que lleva a l’audiencia a pensar na época de Castiellos en Xapón. Como prefin de fiesta, interpretaben ‘Rouge No Dengon’, de Yumi Matsutoya, un hit de radiu de 1975, que l’anime resurde cada poco convirtiendo esi cantar nun himnu interxeneracional.
«Dempués de pasodobles, xotes, muñeires, seguíes con palmes y aplausos pol públicu xaponés, llegaba la parte final na que Villa de Xixón tocaba dos temes xaponeses pa tener un detallín col so públicu»
Como traca final la banda de gaites sacaba a los xaponeses a bailar la ‘Danza de Santana’. El bomberu, traductor y amigu de la banda, Karila Tatsuo, convidaba a los xaponeses a baillar y, nun momentu, la entrada del pabellón convertíase nuna folixa improvisada, con una filera de más de 40 persones. Al acabar los trenta minutos del set, llegaba’l momentu de photocall, más coles y coles pa facer semeyes cola banda, entrugar dudes de les gaites y d’Asturies.
La parte institucional, foron dos intervenciones igual d’especiales. El llevantamientu de la bandera d’Asturies a la entrada del pabellón, interpretando ‘Asturies Patria Querida’, cola presencia de Lara Martínez, Viceconseyera de Turismu del Principáu d’Asturies y Iñigo de Palacio, Embaxador d’España en Xapón. L’otru actu onde participó Villa de Xixón foi’l pieslle de la Expo per parte de los representantes de la Xunión Europea. Una sorpresa en forma de ‘Himnu de l’Alegría’ mentanto los comisarios facíen la semeya de fin d’Expo. Muchos d’esos comisarios entrugaron a los componentes de la banda por Asturies y los sos instrumentos.
«Quince componentes de varies bandes d’Osaka andecharon con Villa de Xixón pa presentar cuatro pases d’un espectáculu de música asturiana y Big Band. Esta mestura de cultures ye persignificativa dientro d’un contestu d’una Expo Mundial»
Por último, ún de los eventos más disfrutaos pol públicu xaponés foi la collaboración de los asturianos con músicos xaponeses. Quince componentes de varies bandes d’Osaka andecharon con Villa de Xixón pa presentar cuatro pases d’un espectáculu de música asturiana y Big Band. Esta mestura de cultures ye persignificativa dientro d’un contestu d’una Expo Mundial. Asina lo entendió’l públicu xaponés, qu’ocupó toles silles disponibles nel coral del pabellón hores enantes de les actuaciones.
Estos temes estrenábense en Xapón pero non n’Asturies. Los arreglos d’Iñaki Askunze, son los qu’axunten a Villa de Xixón y a la Gijón Jazz Band nel espectáculu Cifuentes, Stoldtz y Cía. Toos menos ún: pal pieslle d’esta Big Band con gaites estrenaron l’arreglu d’Asturies Patria Querida’ qu’emocionó a la delegación asturiana y llamó l’atención del públicu xaponés.
«El grau de maduración de les bandes de gaites, bandines, grupos folk y música asturiana en xeneral ye incuestionable. Pue y debe vendese fuera»
Pa Villa de Xixón formar parte del equipu Asturies de la Expo 2025 ye históricu y una xubida de peldañu nes escaleres de los sos venticinco años de trayectoria. Pero esti llogru nun ye namás pa esta banda de gaites de Xixón, ye pa tola música asturiana. El grau de maduración de les bandes de gaites, bandines, grupos folk y música asturiana en xeneral ye incuestionable. Pue y debe vendese fuera. Los músicos asturianos a vegaes perdemos la perspectiva de lo que facemos, pero tenemos una música allegre, pasional y que tresmite. Nesti viaxe xuntáronse dos variables importantes: xente con gana de cuntar y tresmitir, y xente con gana de sentir y deprender. Too esto fizo de la experiencia Osaka Expo ’25 una maraviya.
Suscríbite a les nuestres novedaes
