Asturies recupera la Conseyería de Cultura y Política Llingüística

Asturies entama l’añu políticu con novedaes na composición del gobiernu. Tres de les crítiques únanimes per parte del sector cultural -como se pudo sentir nes comparecencies na Xunta Xeneral del pasáu avientu- y de la disconformidá de parte de la oposición de que nun hubiera una Conseyería de Cultura propia; el presidente Adrián Barbón aprovechó la salida de Melania Álvarez -ex conseyera de Derechos Sociales y Bientar- del gobiernu pa convertir a la Viceconseyería de Cultura, Política Llingüística y Deporte nuna Conseyería. El llunes fízolo anunciando la creación de la Conseyería de Derechos Sociales, Política Llingüística y Deporte, con Vanessa Gutiérrez al frente. Sicasí, pesie a les nueves crítiques a esta macroconseyería, Barbón rectificó y dixebróla en dos organismos estremaos.

D’esta manera, la Cultura, la Política Llingüística y les propies funciones de Vanesa Gutiérrez aumenten de pesu nel gobiernu y na vida política d’Asturies. Vuélvese asina a una situación asemeyada a la de la llexislatura 2011-2015, na qu’había una conseyería específica de Cultura y Deporte; a la que siguiríen en 2015-2019 la d’Educación y Cultura y en 2019-2023 la de Cultura, Política Llingüística y Turismu.

Per delantre queden tres años de trabayu na qu’esta estaya del gobiernu tien que dar respuesta al descontentu del sector cultural, a l’actualización d’una Llei d’Usu y Promoción del Asturianu que va cumplir 26 años y a les directrices y recomendaciones qu’organismos como la UNESCO o la UE lleven décades plantegando en materia de política cultural y que los sucesivos gobiernos asturianos fueron ignorando. El retrasu nes polítiques culturales ye evidente en comparación cola situación d’otres Comunidaes Autónomes, tal y como apunta l’informe La Necesidad de Apostar por el Desarrollo de las Industrias Culturales y Creativas Asturianas.que Xicu Ariza, responsable de Musicasturiana.com, presentó énte la Xunta Xeneral. Sicasí na llexislatura 2019-2023 entamaron a dase los primeros pasos d’una incipiente política cultural qu’ha siguir con esta reestructuración del gobiernu asturianu.

Dexa un comentariu

X