El 14 de febreru remata’l plazu pa inscribise nel XII Concursu de Canción Asturiana Conceyu de Siero

Vuelve ún de los eventos institucionales más veteranos dedicaos a l’asturianada: el Concursu de Canción Asturiana Conceyu de Siero. Esti certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición) aporta esti 2024 a la edición númberu doce. El 14 de febreru remata’l plazu pa inscribise nel concursu y tolos domingos a les 11.30h ente’l 18 de febreru y el 28 d’abril van celebrase les distintes xornaes del concursu nel Auditoriu CPI Llugones y nel Teatru Auditoriu de La Pola. El 12 de mayu va ser la gala de premios d’esti concursu que ye clasificatoriu pal Premiu Autonómicu de Canción Asturiana.

Acordies a les bases, esti concursu tien les siguientes estayes: profesional masculín, profesional femenín, categoría moza, canción dialogada, canción vaqueira y canción ayerana y va repartir 4.400 euros en premios: ente 50 euros y 600 euros pa los siete finalistes de caúna de les estayes absolutes masculines y femenines; 200 euros pa quien gane na modalidá de canción vaqueira y ayerana; y 300 euros pa la pareya qu’algame’l premiu especial canción dialogada Memorial “Agustín Argüelles – Diamantina Rodríguez”. Amás, tolos finalistes van recibir diploma y troféu. La estaya moza ta llendada a un máximu de 22 años y diez participantes; toles persones van recibir troféu, diploma y un obsequiu. Como novedá nesta edición, esti concursu va ser clasificatoriu pal Premiu Autonómicu de Canción Asturiana que’l Gobiernu del Principáu d’Asturies va entamar esti 2024 per primer vegada.

Llugones y La Pola van ser los escenarios d’esta XII edición. Les cuatro eliminatories va facese los domingos 18 y 25 de febreru y 3 y 10 de marzu nel Auditoriu CPI Llugones, que tamién va acoyer el 17 de marzu la primer ronda de les semifinales. Les otres dos van ser el 31 de marzu y 7 d’abril nel Teatru Auditoriu de La Pola, espaciu nel que van celebrase les finales el 21 y 28 d’abril. El certame remata’l 12 de mayu cola gala d’entrega de premios en La Pola. Toles xornaes van celebrase a les 11.30 la mañana con entrada llibre, van tar presentaes por Esther Fonseca y Miguel Ánxel Montenegro y el xuráu ta compuestu por Gerardo García Tolín, Anabel Santiago y Mari Celi Fernández.

Dexa un comentariu

X