Estos son los meyores llanzamientos de 2024 pa los y les llectores de musicasturiana.com

El públicu de musicasturiana.com yá votó les referencies que más-yos prestaron del 2024. D’ente los 44 llanzamientos asoleyaos (19 álbumes y 24 singles) esbillamos los cinco más votaos, que faen referencia a publicaciones de Llevólu’l Sumiciu, La Tarrancha, L-R, Herbamora, Beleño y DRB. Ye amás un reflexu de la pluralidá d’estilos que se faen anguaño n’asturianu, alcontrándose discos y cantares d’electrónica, rock, post-folk, música tradicional renovada y folk celta.

Na estaya de discos el primer puestu ye pa La Llobera de Llevólu’l Sumiciu, el segundu EP d’esti dúu d’electrónica de raigañu qu’amuesa la evolución de la so propuesta. El puestu dos ye pal grupu de mecigayu-ska La Tarrancha, qu’abrió l’añu llanzando’l discu en directo Camin de VENTI, un repasu peles sos dos décades de trayectoria grabáu nel Teatru Vital Aza de L.lena. El puestu tres ye pa V.O.S de L-R, tercer trabayu del dúu post-folk formáu por Leticia Baselgas y Rubén Bada col qu’afitaron el so personal soníu. El cuartu más votáu foi 286 Llunes, l’EP qu’Herbamora llanzó dempués de 11 años ensin publicar material y col qu’entemecen música tradicional y electrónica. Per últimu, ta’l regresu d’unos históricos del folk celta, Beleño, que volvieron dempués de 37 años con Daón.

En cuantes a los cenciellos, el más votáu foi «La panadera» de DRB, un orixinal tema qu’entemez una asturianada con una Geampara -danza folclórica de Rumanía- y con música electrónica. El segundu foi «L.luna«, tema de L-R cola collaboración de Rodrigo Cuevas. «Lluna de collecha» d’Herbamora algamó’l tercer puestu, mientres que «Pela carretera» de La Tarrancha foi’l cuartu. El llistáu de los cinco singles más votaos polos y poles llectores de musicasturiana.com zárrase con «Divina» de Llevólu’l Sumiciu, una reinterpretación d’un tema publicáu orixinalmente nel discu Severina de Mapi Quintana & Elías García.

Discos y EPs asoleyaos en 2024

Esti llistáu ye de los llanzamientos que se publicaron en formatu físicu o nes principales plataformes musicales (Spotify y aplicaciones asemeyaes)

1. La Tarrancha – Camin de VENTI (dixital)
2. L-R – V.O.S (CD, Vinilu y dixital)
3. Tierra y Eco – Fueyes de color infinitu. Homenaxe a Xosé Bolado (dixital)
4. Bear, The Storyteller – L’Ermitañu que coronó les nubes (CD y dixital)
5. Fontoria – El neñu que cuntó toles estrelles (CD)
6. Melandru – II (dixital)
7. Fabes de mayo – Dayuri (CD y dixital)
8. Rubén Alba – Secretos sin contar (CD y dixital)
9. Beleño – Daón (CD y dixital)
10. Picarós – Son d’ermu (CD y dixital)
11. La Banda Latira – La banda… Latira! (CD y dixital)
12. Viuda – Provinciana (CD, Vinilu y dixital)
13. La Bedur – La Bedur (Llibru y dixital)
14. Ferla Megía – Páxaros 01 (CD y dixital)
15. Banda Gaites Fonte Fuécara – Gaiteros (CD y dixital)
16. Llevólu’l Sumiciu – La Llobera (dixital)
17. Herbamora – 286 Llunes (CD y dixital)
18. Vérsica – Vérsica (CD y dixital)
19. Joaquín Pixán – Asturianadas. La memoria de nuestros mayores (CD)

Singles asoleyaos

Esti llistáu ye de los cenciellos que se publicaron nes principales plataformes musicales (Spotify y aplicaciones asemeyaes)

1. L-R y Rodrigo Cuevas – L.luna
2. Guieldu – Flor d’Artu
3. Carlos Casado y Xaime Arias – La mio neña
4. Ún de Grao – Tiráu na calle
5. Fred Warrior – Pallabres n’asturianu
6. Melandru – Shinji sube al EVA
7. Xera – Corales de cristal
8. Tasio – Tener praos
9. Sastre y Coru Al Altu La Lleva – Funeres S/N
10. Coru Al Altu la Lleva – Como augua de torbón
11. Héctor Braga y Víctor Manuel – Valiente
12. El Velcro y Alicia Villanueva – Santolaya
13. Llevólu’l Sumiciu – Divina
14. La Banda Latira – Le voyage rêvé
15. Ferla Megía – Xatu
16. La Tarrancha – Pela carretera
17. Mostru l’Horru – Col asturianu xugamos n’equipu
18. DRB – La panadera
19. Ferla Megía – bele bele
20. Vero Rubio – El día
21. Llevólu’l Sumiciu y Alicia Villanueva – Medio la mar
22. Herbamora – Lluna de collecha
23. DRB – Abdel-Presi
24. Hevia – Busindre Reel 25
25. Héctor Braga – Roubiltones