Bandines, asturianada y agrupaciones folclóriques esti fin de selmana en L’Ascensión d’Uviéu

Dende güei y hasta’l domingu Uviéu celebra la Feria de L’Ascensión, eventu «con antecedentes dende polo menos el sieglu XV» col que la capital del país «homenaxea a los homes y muyeres del campu». La gastronomía y l’artesanía protagonicen esti eventu nel que tamién var tar presente la música tradicional coles actuaciones de la Orquestina La Xarangana, Los Gascones, Pipo Prendes, dellos intérpretes de tonada d’AICA y del Valle del Nalón, les bandes de gaites de Ciudad de Oviedo, Vetusta y El Carbayón, y les agrupaciones folclóriques La Xordia y Fitoria.

El programa musical arranca esti viernes 10 coles actuaciones, de 18h a 20h, de la Real Banda de Gaitas Ciudad de Oviedo y Banda de Gaites Vetusta nel recintu festivu, asitiáu nel Campu San Francisco. Esti día tamién canta Pipo Prendes a les 19h nel Kiosko del Bombé. El sábadu 11 pela mañana continúa la feria cola actuación de La Xarangana (de 11.30h a 14.30h nel recintu festivu) y un pase d’asturianada nel Kiosko del Bombé, de 12h a 14h, protagonizáu pola Asociación d’Intérpretes de Canción Asturiana (AICA) nel que participen Cristina Sánchez, José García González Ché de Cabaños, Álvaro Fernández Conde y Tatiana Suárez Diaz. A la gaita ta Alfonso Fernández y presenta Esther Fonseca.

La tarde del sábadu, de 16.30h a 18.30h, hai más tonada cola Asociación de Amigos de la Canción y el Folclore Valle del Nalón. Presenta Luis Alberto Martín, canten Laudelina Hortal, Virgilio Pato, Raúl Díaz, Berlamino Jesús Alonso, Alicia Villanueva y Patricia Pariente; y el gaiteru ye Ramón Díaz. A les cinco del sábadu tamién ye’l Descensu Folclóricu Feria de L’Ascensión, cola participación de les bandes de gaites y grupos folclóricos del Conceyu.

Más folclor el domingu

Por último, el domingu les actuaciones de música tradicional concéntrense toes nel recintu festivu con Los Gascones (11.30h a 14.30h), la Banda Gaites El Carbayón (11.30h a 14.30h) y, de 17h a 20h, los pases de l’Asociación de Baile y Música Tradicional La Xordia y Grupu de Baille Tradicional Fitoria.

Dexa un comentariu

X