El Zarréu Fest enllena Degaña de música, cultura, identidá y patrimoniu del 28 al 30 de xunu

Naz un nuevu festival nel suroccidente asturianu, el Zarréu Fest. AMA Asturies, en collaboración con vecines y profesores de Zarréu (Degaña) y con financiación de la Conseyería de Cultura, Política Llingüística y Deporte, entama esta «sestaferia cultural» del vienres 28 al domingu 30 de xunu. Nella va haber baille tradicional, gaita, pandereta, actividaes pa la reciella, meses redondes, l’estrenu d’una película nueva d’Álex Galán (Il Mulín, Salvajes…) y los conciertos de L-R, D’Urria, Dixebra, Castora Hertz, Algaire y 6 Riales. Too ello con zona d’acampada y entrada llibre.

«Esta sestaferia cultural nun pretende ser un festival al usu. Ye un eventu comuñal qu’apuesta pola cultura como pegollu del pueblu. Una lluz que sirva p’allumar el futuru pa esta tierra precisada de proyeutos, emburrie social, curiáu per parte de les alministraciones ya impulsu nel ánimu de la población que faiga espoxigar la zona y a los sos habitantes. Ente toes vamos demostrar que les zones rurales en peligru de despoblamientu n’Asturies nun tán muertes y tienen futuru gracies al trabayu comuñal de la so xente», argumenta’l colectivu Asamblea Moza d’Asturies pa entamar esti eventu en Degaña.

A falta de presentar el programa completu, el Zarréu Fest yá anunció los conciertos, qu’entemecen música tradicional, rock y electrónica. El vienres 28 de xunu toquen el dúu post-folk L-R, la formación foik l.lacianiega D’Urria y el proyectu castellanu d’electrónica de raigañu Castora Hertz; mientres que’l sábadu van facelo Dixebra col so rock astur, Algaire cola so música tradicional fusionada y el tríu femenín de percusión tradicional 6 Riales.

Más actividaes de baldre

Los próximos díes va anunciase’l restu del programa, nel que la organización anuncia que va haber «cuentacuentos, meses redondes, vermús, baille tradicional, banda de gaites y pandereteres, película d’Aléx Galán, mercáu tradicional…». Toles actividaes van ser de baldre y hai zona d’acampada gratuita durante un fin de selmana «enllenu d’identidá, patrimoniu y cultura asturiana».

Dexa un comentariu

X