El XII Concursu de Canción Asturiana de Siero yá tien campeones y actúen esti domingu na gala final

Dempués de nueve xornaes clasificatories qu’entamaron el 18 de febreru, el XII Concursu de Canción Asturiana Conceyu de Siero yá tien campeones y van actuar esti domingu 12 a les 11.30h nel Teatru Auditoriu de La Pola, dientro de la gala d’entrega de premios na que tamién toquen Los Ñerbatos. Les y los campeones son Alicia Villanueva Megido (absoluta femenina); Isaac Sierra Longo (absolutu masculín); Carlos Velasco Montes (canción vaqueira, memorial Graciano Gutiérrez – Radio Pola) y Maribel González Morán (canción ayerana). Amás Alicia Villanueva y Carlos Velasco repiten primer puestu dientro de la modalidá de canción dialogada, memorial Agustín Argüelles y Diamantina Rodríguez.

El Concursu de Canción Asturiana Conceyu de Siero ye ún de los eventos institucionales más veteranos dedicaos a l’asturianada. Pa esta edición inscribiéronse más de 60 persones dividíes en ventiocho homes, nueve muyeres y doce rapazos y rapaces d’ente 10 y 21 años. Tamién s’inscribieron ocho persones pa la modalidá de canción vaqueira, nueve pa l’ayerana y dos pareyes pa la de tonada dialogada. Ente los siete finalistes de caúna de les estayes absolutes masculines y femenines va repartise 4.400 euros en premios, que van dende los 50 hasta los 600 euros. Amás, esti concursu va ser clasificatoriu pal Premiu Autonómicu de Canción Asturiana que’l gobiernu asturianu va entamar esti 2024 per primer vegada.

«Queremos que la gala d’entrega de premios seya un actu mui prestosu», comenta Miguel Ánxel Montenegro, presentador del concursu a lo llargo toles xornaes xunto a Esther Fonseca. D’esta manera, amás de les y los campeones, van actuar Los Ñerbatos, formación de cantares de chigre qu’ente los sos componentes cunta con nomes perconocíos dientro de la música n’asturianu como Nacho Fonseca o Roberto González-Quevedo. A ella van asistir tamién dellos representantes institucionales: «Vanessa Gutiérrez, conseyera de Cultura, Política Llingüística y Deporte; Xosé Antón González Riaño, presidente de l’Academia de la Llingua Asturiana; los alcaldes de Sariegu, Noreña y Samartín del Rei Aurelio; y les conceyales de Cultura de Siero, Bimenes y Llangréu», sorraya Montenegro.

Intérpretes xóvenes

Amás de les categoríes d’adultos, esti XII Concursu de Canción Asturiana Conceyu Siero tamién tenía una categoría moza llendada a un máximu de 22 años y diez participantes. Lucía Rojo (Mieres, 2002), Néstor Díaz (Llanes, 2010) y Marina Carbajosa (Grau, 2008), son los representantes d’esta estaya que van actuar na gala d’entrega de premios d’esti certame entamáu pol Ayuntamientu Siero, la so Fundación Municipal de Cultura y AFATRA (Asociación de Folclore Amigos de la Tradición) y que tuvo como gaiteru oficial a Valentín Fuente.

Dexa un comentariu

X