Burbús: nuevu single, conciertu presentación y llanzamientu d’EP
El pasáu mes de marzu presentábase’l proyectu musical nuevu Burbús. Cinco veteranos de la escena asturiana crearon esti grupu que presentaron asina: «Partimos de la tradición, pero rápido enfocamos l’aldu escontra un llugar alloñáu de les categoríes y estilos musicales concretos coles llendes qu’ellos suponen, faciendo un repertoriu variopintu y eclécticu que xunta tradición y creación nueva». Tres llanzar el videoclip de “Caldueñu“, asoleyen agora “Culubreiru” y anuncien que’l viernes 27 va tar el so EP disponible en formatu físicu y dixital. Con ello calienten los motores pal sábadu 28 de mayu, día nel que van dar el so primer conciertu.
Burbús garra’l so nome del verbu burbusar que ye falar en voz mui baxo con daquién pa que nun s’enteren otres persones de lo que se diz. Nació en 2021 alredor del gaiteru y flautista José Luis García y el violinista Juan Diego Gómez y dende esi momentu fueron trabayando n’alcontrar la so personalidá y incorporando a los demás componentes: Ginés Fernández al curdión; José Martínez -más conocíu como Ún de Grao-a la voz y guitarra; y Javier San Marcos al baxu y chelo.
El sábadu 28 de mayu, a les 19h, nel salón de conciertos de la Escuela de Música Tradicional Villa de Xixón (c/ Severo Ochoa 22), van dar la so primer actuación. Un día enantes van asoleyar el so primer EP formáu polos singles yá publicaos “Caldueñu” y “Culubreiru”, amás d’una tercera pieza inédita: “Pichón”.
