Córcega gana’l Liet International 2022, l’Eurovisión de les llingües minorizaes
El festival de la canción en llingües minorizaes d’Europa Liet International del presente añu celebrábase’l pasáu 13 de mayu y nél resultaba ganador el tema tituláu «Roma», interpretáu en corsu pola cantante Doria Ousset; con lletra del pedagogu y escritor Paul Turchi-Duriani esti cantar fala d’un episodiu doliosu del sieglu XVII de la historia de la comunidá corsa na ciudá de Roma.
La decimotercer edición d’esti alcuentru musical desenvolvíase na ciudá de Tonder (Dinamarca) y nella la cantante corsa, que tien una carrera estensa y reconocida naquella isla, algamaba’l primer puestu. El so estilu musical caracterízase por fusionar la canción d’autor con toques folk y de la música tradicional, nel que nun falten ambientes rock.
El segundu puestu yera pal grupu de la rexón de Schleswig-Holstein (Alemaña) Yourdaughters, cola canción «Hudsult» -interpretáu na variedá danesa falada nesi territoriu-, mientres que’l tercer puestu llográbalu la intérprete gallega Carolina Rubirosa con «O teu camiñar».
Nesta ocasión foron trece los grupos y solistes participantes, que representaben a llingües como’l frisón, francoprovenzal, sardu, sami, baxu alemán o catalán. Esta ye la segunda vegada qu’un representante corsu algama la victoria, depués de que nel añu 2008 lo fixera Jacques Culioli y Dixebra quedara segundu na ciudá lapona de Luleå (Suecia).
8 años ensin participación asturiana
Esti concursu ye la versión internacional d’otru llamáu ‘Liet’ (que significa «canción» en frisón), dedicáu a los artistes que canten nesi idioma y que s’entamaba per primer vez nel añu 1991 na ciudá de Ljouwert (Frisia, nel norte de los Países Baxos). Nel añu 2002 decídese crear un eventu de calter internacional nel que participen artistes de llingües minorizaes del continente européu.
Asturies tien participao en siete ocasiones, la primera nel 2008, cuando la organización seleccionó a Dixebra directamente y les otres nel periodu en que los ganadores del Premiu al Meyor Cantar representaben a la llingua asturiana nel festival, dalgo que dexó de facese nel añu 2014.
