Grau yá tien teatru auditoriu nuevu y pa celebralo la conceyalía de Cultura entama Ablugarte. Cultura Moscona, un ciclu inaugural nel que los artistes llocales van ser los protagonistes. Cine, teatru y música van tar presentes nuna programación qu’esti sábadu 11 acueye un conciertu de Calea. El tríu folk formáu por Leticia Baselgas, Rubén Banda -dambos residentes nel conceyu moscón- y Silvia Quesada va actuar a les 19.30h con entrada de baldre.
«L’espaciu yera mui necesariu y da respuesta a una demanda social«, desplica Gustavo Adolfo Fernández, técnicu de cultura del Conceyu Grau, al rodiu d’esti nuevu auditoriu que naz pa dar a la villa moscona «un espaciu más que dignu, nel que facer teatru de calidá, conciertos, cine… y que complemente a la casa de cultura y a toles actividaes que se faen al aire llibre». Na sala tamién ta previsto que se programe «muncha música asturiana y n’asturianu, de siguío«.
La música’l país tuvo mui presente yá dende la propia inauguración d’esti nuevu Centru Cultural Teatru Auditoriu el pasáu 19 de setiembre, na qu’actuaron Ambás ya Ramsés y la Banda Gaites Conceyu Grau, amás d’otros músicos llocales. La selmana pasada tamién se celebró’l concursu de pareyes de gaita y tambor Memorial Diógenes García, eventu que va caltenese tolos años. «Van programase tamién munches coses musicales n’horariu escolar pa que vengan los centros de Grau y de tola comarca» sorraya Fernández destacando la «programación propia» que va haber amás de la collaboración con circuitos de la Conseyería de Cultura, Política Llingüística y Deporte como Asturies Cultura en Rede o la Xira Didáctica.
Esti espaciu nuevu ta formáu por «245 asientos, dividíos nun patiu y otres dos altures«, desplica’l técnicu de Cultura, añadiendo que «los conciertos son pa ver sentaos, porque ye un auditoriu con asientos». Amás cunta con un otru «gran espaciu polivalente col que naguamos que sirva pa ensayu de compañíes teatrales y musicales» y con «una terraza que tamién val pa facer actividaes». Gustavo Adolfo Fernández tamién destaca que la intención de la sala ye que sirva «pa los artistes, pa les compañíes llocales, comarcales y d’onde seyan, pa que lo usen mesmo p’amosar les sos obres como pa facer coses nesi espaciu polivalente que tien».
«Tovía hai que facer axustes. Ye un tren qu’arrancó, pero tovía nun garramos velocidá de cruceru. Inauguróse prácticamente’l día que s’entregó la obra y nun tenemos entá’l 100% del equipamientu furrulando, polo que pido a la xente que nos tienen que dar esos 100 díes que tamién se da a los políticos pa que l’equipamientu furrule dafechu», añade con enfotu’l responsable de Cultura del Conceyu Grau.
Asina ye como pasín a pasu va construyéndose esta nueva infraestructura cultural que vien a dar respuesta a les carencies y demandes culturales nel centruoccidente asturianu. L’interés por parte’l vecindariu taba claro: «en malpenes 15 díes diéronse d’alta una montonera persones nel canal de noticies de WhatsApp, superando agora mesmo los 800 suscritos que reciben información de toles actividaes». El conciertu d’esti sábadu de Calea ye una bona oportunidá pa conocer esti espaciu nuevu y sentir música’l país.
Suscríbite a les nuestres novedaes
