L’asociación de folclore La Flor de Grau ta acabante d’anunciar a qué persona van gallardonar col II Premiu La Flor de Grau. L’escoyíu ye «Lisardo Lombardía, referente imprescindible de la cultura y del folclore asturianu», como argumenten dende la entidá. El próximu sábadu 11 d’abril a les 19h na Capiella Los Dolores de Grau va ser la entrega del premiu, na que va haber delles intervenciones.
«Vamos facer un reconocimientu anual nel tiempu de la primer Flor nel qu’agradezamos l’enfotu de persones y organizaciones que lleven tola vida calteniendo’l folclore y tresmitiéndolo a les xeneraciones nueves. Un enfotu desinteresáu, a vegaes incomprendíu, abegosu y costosu que namás la pasión y la constancia lleven alantre», manifestó esta asociación nes sos redes sociales pa presentar l’añu pasáu esti Premiu La Flor de Grau que l’añu pasáu concedieron a Mariluz Cristóbal Caunedo.
Amás, na entrega d’esti sábadu van participar dellos y delles convidaes: Ainhoa García García, la Banda de Gaites Teixo-Manolo Quirós, Celia González, Fe Santoveña, Ignaciu Llope, Mariluz Cistróbal Caunedo, Marina Carbajosa, Taller «Lolo Cornellana» y Xuan Fernández-Piloñeta.
Lisardo Lombardía Yenes nació en Llaviana en 1955. Foi ún de los fundadores del colectivu Belenos, grupu d’estudios etnográficos asturianos; creador y director artísticu de les Nueches Celtes d’Uviéu, del Festival d’Arpa Celta y del Festival Oviedo Folk durante los años 80-90. Dende 1985 venceyóse al Festival Intercélticu de Lorient, a lo primero como delegáu y llueu como director xeneral dende 2007 hasta 2021. En 1987 creó la empresa discográfica Fonoastur y desendolcó un trabayu intensivu de grabación y de distribución de música, cola producción de más de 150 referencies discográfiques ente les que s’alcuentren dellos de los discos más destacaos del folk y la música tradicional asturiana. Tamién dirixó’l Club Prensa Asturiana del diariu La Nueva España.
La so actividá bayurosa en defensa de la cultura asturiana y del interceltismu llevólu a recibir prestixosos reconocimientos. Dende 2009 ye miembru del Conseyu Cultural de Bretaña. En 2015 recibió la Medaya de Plata d’Asturies; en 2021 la de la ciudá de Lorient y del Institutu Cultural de Bretaña. Finalmente el Ministeriu de Cultura de la república Francesa nomólu como «Chevalier de l’Ordre des Arts et des Lettres». En 2022 tamién foi nomáu Académicu d’Honor de l’Academia de la Llingua Asturiana y recibió l’Urogallo Especial del Centru Asturianu de Madrid y l’añu pasáu foi distinguíu Premiu Internacional de Folclore «Martínez Torner» d’Uviéu y pola Banda Gaites Castrillón.
Suscríbite a les nuestres novedaes
