L’Alcuentru Européu La juventud rural para una ConCiencia Histórica organizáu pola Xunta Cultural Llabores en collaboración col Ayuntamientu de Grau, quixo reconocer y tresmitir con un conciertu el patrimoniu musical asturianu. El grupu Cordes —concebíu nun primer momentu como una banda efímera— tuvo formáu por Haim Álvarez a la voz, guitarra y banjolele; Begoña Venegas a la voz, rabel y panderetes; Andrés García a la guitarra y Celia Nieto al vigulín.
Tanto espertos y espertes en patrimoniu de Finlandia, Rumanía, Eslovaquia, Valencia, Aragón, Lituania o Francia como los vecinos y vecines de Grau, pudieron esfrutar d’un conciertu nel que se versionaron xotes y dances, amestaes con composiciones propies de los integrantes y dalgunes covers de grupos perconocíos d’Asturies y Cantabria. Destacó especialmente’l so interés pol romanceru peninsular, con interpretaciones esquisites de ‘El Jándalo’ y ‘La Valiente Isabel’.
Mesmo si Cordes foi un proyectu pop-up, creáu ex profeso pa esti alcuentru, tanto vecines como visitantes amosaron un notable interés pola continuidá de la formación, que presentó un repertoriu cuidadosamente esbilláu y una sonoridá bien definida y personal.
Amás d’esti conciertu, nes charres previes celebraes a lo llargo de la mesma xornada, presentáronse a la población de Grau delles propuestes con componente musical, dende territorios como Lituania o Bretaña, esperando que’l diálogu ente la villa moscona y estes iniciatives europees pueda continuar tamién nel futuru.
Suscríbite a les nuestres novedaes
