Candás acueye esti fin de selmana’l IV Reguerada Fest con delles actividaes musicales

Dientro la bayurosa programación hai conciertos de Ferla Megía y Herbamora, charres al rodiu música asturiana, un taller de baille y danza prima

Eventos

Del 14 al 16 de payares Candás va acoyer la cuarta edición del Reguerada Fest, feria d’empreses, lliteratura, música, artes visuales y escéniques y gastronomía qu’entama la Conseyería de Cultura, Política Llingüística y Deporte cola coordinación del músicu y escritor Xaime Martínez. Dientro de la programación va haber espaciu pa la música’l país colos conciertos de Ferla Megía y Herbamora; les charres La oralidá na cultura asturiana y Palabres pa cantar; la presentación de Diarios d’una panderetera; un taller d’iniciación al baille con Santi Galguera; el recital Poesía electrónica; y danza prima col Grupu Baille San Félix.

La Fábrica d’Ortiz y la Biblioteca de Candás van ser l’escenariu de les actividaes rellacionaes cola música asturiana del IV Reguerada Fest. El vienres 14 a les 18.30h, los músicos Leticia Baselgas, Tante Blanco y el filólogu Xulio Viejo dan forma al alderique La oralidá na cultura asturiana. A les 20h Baselgas va presentar los sos Diarios d’una panderetera na Biblioteca de Candás y la xornada d’esi día remata con un conciertu de Ferla Megía a les 20.30h.

Pal sábadu 15 les actividaes musicales entamen a les 13.30h col taller d’iniciación al baille tradicional que va poner el músicu, profesor de baille y etnomusicólogu Santi Galguera. Yá pela tarde, les músiques Marta Elola y Tania Pereira van tener la charra Palabres pa cantar. El día zárrase con un conciertu d’Herbamora a les 20.30h.

Munches más actividaes

L’axenda musical del Reguerada Fest pal domingu 16 continúa col recital Poesía electrónica -13.30h- nel qu’Alfredo Garay, Marina Pangua y Lluis Xabel Álvarez van poner pallabres a la música de The Coffee Boy y el pieslle del festival aporta a les 14.30h dempués d’una danza prima entamada pol Grupu Baille San Félix.

Amás de música, nesti eventu gratuitu y pa tolos públicos dedicáu la creación cultural y empresarial en llingua asturiana va haber un mercáu con feria de llibros y empreses n’asturianu; visites guiaes per Candás; otros alderiques, talleres y recitales de poesía; showcooking y actividaes pa la reciella. Tola programación pue vese equí.