Ferla Megía gana’l XVII Premiu Camaretá con ‘Xatu’

«Quémala guah.e» ye la frase que meyor resume la gala del XVII Premiu Camaretá al Meyor Cantar. Estes pallabres de Los Berrones na versión que faen de ‘La Moto Pachín’ nel discu Xentiquina Crew y que Ferla Megía samplea en ‘Xatu‘ fixeron que’l Teatru Vital Aza de L.lena amburara y, con ello, el xoven músicu algamara’l gallardón a la meyor canción n’asturianu d’esta convocatoria. Too ello nuna tarde que reflexó’l bon momentu que vive la música’l país, yá que tolos otros artistes y cantares nominaos -‘Valiente‘ d’Héctor Braga, ‘Eclipse total‘ d’Herbamora y ‘L’Ablugada‘ de Lïbre– amosaron una grandísima calidá en cuantes a composición y interpretación en directo.

L’actriz y performer Mariajo Baudot y l’actor Félix Corcuera foron los responsables de guiar esta gala qu’aportó con novedaes. El formatu de presentación foi muncho más desenfadáu que n’anteriores ocasiones, col usu del humor y la interpretación teatral per parte de los presentadores a lo llargo de tol certame. Per otru llau, a cuenta d’un cambiu de fecha nel día programáu, l’escenariu nun foi’l Teatru La Llaboral de Xixón y treslladóse al Vital Aza de La Pola; daqué que causó qu’a nivel artísticu’l resultáu fuera peor, por mor de que les lluces blanques tuvieron prendíes durante tol espectáculu -a cuenta de la grabación pa la TPA que s’emite esti domingu pela nueche- y torgó qu’una iluminación afayadiza de les actuaciones fixera qu’estes ganaren tovía más en calidá.

Herbamora foron les primeres en xubir al escenariu pa interpretar ‘Eclipse Total’ y nun lo fixeron soles. Les cinco pandereteres y cantantes -que foron les ganadores del segundu Premiu al Meyor Cantar convocáu en 2008- tuvieron acompañaes de Diego C. Camiña y Marcos García a les percusiones, d’unes proyecciones qu’arriquecieron la fuercia que tresmite la canción. La so interpretación foi tovía más sorprendente cuando a metá d’esti cantar qu’axunta tradición y música electrónica entró n’escena un grupu de danza contemporánea que-y dio más color tovía a una actuación perfecta.

Épica, memoria histórica, tradición y desenvoltura foron de la mano na actuación d’Héctor Braga. El multiinstrumentista repetía per segundu añu consecutivu como finalista del Camaretá y con ‘Valiente’ amosó la so gran capacidá interpretativa y compositiva. Salió a escena pasiando ente’l patiu de butaques y, como yá fixera l’añu pasáu, la so amuesa tuvo acompañada pola proyección del videoclip d’esti cantar y cola collaboración de componentes de la Banda Gaites Picos d’Europa.

Darréu llegó’l turnu de Ferla Megía, que tamién repetía nominación d’un añu pa otru pero con un cantar distintu dafechu. Si l’intimismu marcó l’actuación del pasáu añu, nesta ocasión foi’l flow lo que fizo qu’esti músicu sierense enllenara l’escenariu y el teatru siendo él solu, dos baquetes, un micru, una caxa ritmos y la proyección de les lletres «quémala guah.e» los encargaos de defender ‘Xatu’ énte un públicu al que Megía supo ganase saliendo tamién a actuar ente’l patiu butaques. Como en 2024, tamién remató’l show con reivindicación, qu’anguaño dedicóla a Palestina.

Los últimos en xubir a escena foron Lïbre, banda formada por veteranos del rock y punk estatal que, como bien dixeron nel videu de presentación, con esti proyectu apetecía-yos «baxar revoluciones» y facer un rock alternativu más sele con influencies pop. Reflexáronlo perbién cola guapura de ‘L’Ablugada’ y con una interpretación que tuvo enllena d’emotividá y amosó la potencia capaz de tresmitir un baxu, dos guitarres, una batería y una voz cuando empastien perfectamente. Al igual que los demás finalistes, una pieza audiovisual -nesti casu ellaborada a costa fecha pa esta gala- acompañó a la so actuación.

Darréu llegaba’l conciertu de La Bonturné, ganadores del XVII Camaretá con «Odisea la Nuí«. El cuartetu dio un espectáculu enllenu del virtuosismu y la complicidá de quien lleva más de 25 años tocando xuntos. Ente les cinco pieces que tocaron incluyeron una versión de ‘A la vera de borín’ de La Bandina y nun faltó l’humor del que fai usu siempre’l frontman David Varela, que remató’l conciertu con un sonoru «L’asturianu llingua oficial, ¡Yá!».

Mentanto l’actuación de La Bonturné, cada miembru del xuráu -formáu pola música y periodista Alicia Álvarez; el periodista y xestor cultural Xicu Ariza; la técnica en normalización llingüística Penélope Miranda; la música y filóloga Andrea Joglar; y la docente d’asturianu y panderetera Emma Posada-, puntuó del 1 al 4 a caún de los cantares finalistes; unos temes mui estremaos en cuantes a estilu y propuesta escénica que fixeron mui complicada la votación, porque cualquiera podía ser ganador. ‘Xatu’ foi’l más puntuáu y los componentes de La Bonturné xunto a la conseyera de Cultura, Política Llingüística y Deporte, Vanesa Gutiérrez, dieron-y a Ferla Megía la estatua d’un gallardón que tamién inclúi 6.000 euros en metálicu, la realización d’un videoclip y participar dientro del circuitu Autores nel Camín.

Nel so agradecimientu, Megía tuvo unos pallabres pa los demás concursantes, pa los sos pas y collacios -que tuvieron sofitándolu dende la primer fila- y agradeció un premiu que-y da puxu nel so llabor camín de la profesionalización como músicu, tres de llevar con una guitarra na mano dende los 17 años. La photo finish con tolos participantes de la gala conxeló’l gran momentu que vive la música n’asturianu, gracies a la diversidá que quedó reflexada nesta decimoséptima edición del Premiu Camaretá al Meyor Cantar na que sonó música tradicional, electrónica, rock, rap, dembow y folk. Como cantaben los l.lenizos La Col.lá Propinde y titulaba’l documental sobre la música asturiana que fixo en 2004 Producciones L.luna L.lena; el Teatru Vital Aza de La Pola amosó que nesta escena «Sigue’l camín».