Carla Armas y Rubén García ganen el Premiu Camaretá al Meyor Cantar cola so primer canción compuesta n’asturianu
Nin pa ¿Aú?, grupu con componentes que lleven 30 años trabayando cola música tradicional asturiana; nin pa la Banda de Gaites Camín de Fierro, qu’apostó por renovar el soníu d’estes agrupaciones y innovar con él al mecelu col d’una banda de rock; nin pa L-R, ún de los nomes más exitosos y orixinales de la música n’asturianu de los últimos años gracies a la so propuesta post-folk. Per primer vez, el Premiu Camaretá al Meyor Cantar foi pa una formación que tien namás una canción asoleyada na so canal de YouTube n’asturllionés, pa Carla Armas y Rubén García con “El conoz a tierra“.
El zamoranu Rubén García y la xixonesa Carla Armas son dos compositores que tienen una carrera enllena de reconocimientos. Les obres de García interpretáronse en diferentes países de tol mundu, y algamó dellos premios de composición en concursos internacionales n’España, Italia o Xapón. Amás, como poeta tamién tien publicaos poemes n’asturllionés occidental, variedá llingüística na que ta escrita la lletra del cantar col que participen nesti premiu. Per otru llau, Armas lleva años componiendo, interpretando y produciendo música pa documentales, publicidá y audiovisuales en xeneral, amás d’ofrecer un serviciu de componer canciones pop/rock personalizaes por encargu pa celebraciones y regalos únicos.
“El conoz a tierra” impúsose a los otros cantares interpretaos por bandes consolidaes de la escena de la música n’asturianu: “Tomasín” de ¿Aú?, “Flacos y ensin peinar” de la Banda Gaites Camín de Fierro y “Veis Volver” de L-R; y llevó’l premiu formáu por 6.000 euros, la realización d’un videoclip, asina como la promoción y divulgación del cantar ganador nos medios de comunicación y nos eventos entamaos o promovíos pol Gobiernu del Principáu d’Asturies.
14 años del Meyor Cantar
En 2007 el Gobiernu del Principáu d’Asturies creó’l Premiu al Meyor Cantar. Con 13 ediciones cellebraes, esti gallardón vien reflexando la vitalidá y la diversidá de la música fecha nes llingües autóctones d’Asturies. Nos anteriores años lleváronlu destacaos nomes venceyaos a la escena de la música n’asturianu: Toli Morilla con “Azul y gris”, Herbamora con “Nosh”, Alfredo González con “La nada y tú”, Xera con “Tierra”, Skama la Rede con “Condenáu”, Asturiana Mining Company con “Si nun conoces Va.louta”, Taranus con “Ensin ti”, Banda de Gaitas El Trasno con “Volviche”, Anabel Santiago con “La lloca”, Luis Núñez y Los Folgazanes con “La ñeve y la esmeralda”, Lafu y Rebeca con “Les sombres sobre la yerba”, y Rodrigo Cuevas con “Rambalín”.
