La música tradicional asturiana y el patrimoniu cultural venceyáu a ella tienen presencia na primer edición de FilmeTrad, el Festival Internacional de Cine Documental de les Tradiciones del Mundu, que se celebra del 12 al 18 d’ochobre en Cabranes y Piloña. Ente los títulos escoyíos pa esta edición figuren producciones venceyaes a la cultura asturiana, con especial atención a la memoria colectiva, les celebraciones populares y les formes de vida que siguen dando identidá a les comunidaes rurales.
Ún de los títulos destacaos ye Somos ramo: identidá colectiva na parroquia de Bimeda, un documental de 89 minutos dirixíu pola Asociación Cultural El Bail.le y producíu por Benito Sierra, al traviés de BSG·MEDIA. La película avera al públicu a la tradición de la ofrenda del ramu en Bimeda, na parroquia de Cangas del Narcea, recuperando los testimonios de vecinos y vecines sobre’l significáu d’esta práctica y los venceyos comunitarios que se construyen alredor d’ella. El trabayu ta realizáu n’asturianu y castellanu y cuenta cola música d’Otramiente, incorporando asina la creación musical asturiana a una producción centrada na tresmisión del patrimoniu cultural.
La presencia asturiana complétase con El Matancíu: vida y muerte nes tradiciones, un curtiumetraxe etnográficu de 15 minutos dirixíu por Elia Campo y ambientáu en Llamigu, nel conceyu de Llanes. La producción recueye la memoria de Carmen Rodríguez Valle, de 95 años, al rodiu de la matanza del gochu y de les formes de convivencia y trabayu compartíu que caracterizaron la vida rural. Anque nun ta centrada específicamente na música, la película participa d’esa mesma voluntá de documentar y tresmitir les costumbres que formen parte de la cultura popular asturiana.
FilmeTrad naz como un espaciu d’alcuentru ente’l cine documental, les tradiciones y les cultures del mundu. La programación d’esta primer edición axunta 21 películes escoyíes ente cerca de 250 obres recibíes, con proyecciones en distintes llocalidaes de Cabranes y Piloña. La propuesta busca abordar el patrimoniu como una realidá viva, sometida a tresformaciones y venceyada a les persones que lu caltienen.
Les sesiones siguen hasta’l 18 d’ochobre, con proyecciones a les 19:00 hores en distintos espacios culturales de Cabranes y na Casa de Cultura Marqués de Vistalegre de L’Infiestu. La programación completa, colos títulos y les sedes de cada sesión, pue consultase na web oficial de FilmeTrad.
Suscríbite a les nuestres novedaes
