Un videu publicáu n’Instagram nel que cinco pandereteres y cantantes mui moces interpretaben la ‘Rumba del Corralín’ foi va dos años la carta presentación d’Otramiente, formación de música tradicional de Cangas del Narcea. D’entós pacá, esti grupu foi llanzando pasín a pasu otros videos -qu’acumulen más de 80.000 reproducciones n’Instagram-; crearon les L.lariega Sessions; actuaron n’eventos y romeríes y dieron dos conciertos hasta la fecha col nome d’Otramiente. Esti fin de selmana van sumar otres dos feches a la so trayectoria: el vienres 3 toquen a les 21.30h nel III Zarréu Fest y el domingu 5 a les 19.30 nes Terrazas de Camagüey, en Mazaneda (Gozón). Falamos con elles p’afondar nesta propuesta nueva de música asturiana que fai que medre’l númberu de formaciones d’esti estilu afitaes nel suroccidente y de bandes moces de música’l país.
¿Cuándo, cómo y por qué naz Otramiente?
Toes entamamos de nenes nel grupu de baille tradicional del suroccidente asturianu Perendengue que fai la so actividá dientro de l’asociación cultural El Bail.le, de la que tamién somos socies. Ellí deprendimos a tocar la pandereta, a cantar y a baillar, y colos años, amás de compartir ensayos y actuaciones, ficímonos mui amigues. Fai más o menos un par d’años empezamos a pensar nun nome, porque hasta entós siempre fuéremos les pandereteres del grupu de baille tradicional Perendengue (y siguimos siéndolo), pero queríemos una identidá propia que nos representara a les cinco. Y asina nació Otramiente, espresión canguesa que quier decir «d’otra manera» o «per otru llau».
¿Quién lo formáis y qué edaes teneis?
Formámoslo: Sandra, Lucía, Carmen, María y Aida. Tenemos ente 19 y 26 años.
«Toes entamamos de nenes nel grupu de baille tradicional del suroccidente asturianu Perendengue. Ellí deprendimos a tocar la pandereta, a cantar y a baillar, y colos años, amás de compartir ensayos y actuaciones, ficímonos mui amigues»
Esti fin de selmana facéis doblete; tocáis el vienres nel Zarréu Fest y el domingu nes Terraces del Camagüey. ¿Qué pue vese nun conciertu d’Otramiente? ¿Cuántos conciertos distis hasta la fecha?
Nos nuesos conciertos centrámonos sobre too nel repertoriu tradicional de la nuesa tierra, Cangas, y tol suroccidente asturianu, que ye riquísimu. Tocamos, con pandeiru cuadráu o pandereta, jotas, sones d’arriba, muñeires, agarraos y rumbes, ente otros. En cuantes al númberu de conciertos, llevamos dos: ún nel Festival de Samhain de Rioscuro, en payares del pasáu añu, y otru a finales de mayu en Vil.lablino. Nos dos, toes tocamos la pandereta o’l pandeiru cuadráu, pero esti fin de selmana vamos dar un pasu más allá, incorporando’l tecláu como instrumentu nuevu dientro del grupu. Ye dalgo asemeyao a un esperimentu: queremos ver qué tal resulta y qué acoyida tien ente’l públicu, y dende ehí decidir si se queda como daqué habitual nel nuesu soníu.
Fuistis asoleyando nesti tiempu dellos vídeos n’Instagram que titulais ‘L.lariega Sessions’. Si podéis cuntar un poco más qué ye esto.
Les ‘L.lariega Sessions’ son un chisgu pequeñu al conocíu productor Bizarrap, coles qu’intentamos amosar la música tradicional de la nuesa zona d’una manera más amena, sobre too pa la xente mozo que tovía se resiste a afondar nesti tipu de música y los sos raigaños. Préstanos pensalo como una manera d’axuntar lo tradicional y lo moderno: dos coses que conviven igual de bien na nuesa vida ensin anulase la una a la otra. Grabámosles na cocina vieya (o l.lariega) de los nuesos vecinos. Tenemos pensao subir unes cuantes, como una pequeña serie pa que la xente nos vaya conociendo y viendo lo que facemos.
«Nos dos conciertos que dimos, toes tocamos la pandereta o’l pandeiru cuadráu, pero esti fin de selmana vamos dar un pasu más allá, incorporando’l tecláu como instrumentu nuevu dientro del grupu. Ye dalgo asemeyao a un esperimentu: queremos ver qué tal resulta y qué acoyida tien ente’l públicu»
Aparte d’estos vídeos, ¿tenéis en mente grabar discu?
Sí que nos prestaría grabar un discu nun futuru non mui llonxanu. Anque Otramiente existe como tal dende va más de dos años, la verdá ye que costónos arrancar el proyectu, ente estudios, trabayu y qu’a la fin caúna tien la so vida. Si yá siendo dos persones a vegaes ye difícil facer coincidir los horarios pa vese, siendo cinco hai qu’organizar un auténticu tetris d’horarios pa poder xuntase y preparar coses. Pero ehí siguimos, y esperamos qu’en dalgún momentu, más pronto que tarde, llegue’l discu.
¿Tol repertoriu qu’interpretáis ye tradicional o tenéis tamién temes de composición propia? Si nun los tuviereis, ¿tenéis intención de facelos?
El nuesu repertoriu ye fundamentalmente tradicional, de Cangas y tol suroccidente, anque tamién abrímonos a deprender y tocar cantares d’otres zones y conceyos d’Asturies, y de comunidaes vecines como Castiella y Llión o Galicia. Nun tenemos temes de composición propia y pel momentu nun tenemos en mente facelos, pero nun nos zarramos a nada.
«Nes’L.lariega Sessions’ intentamos amosar la música tradicional de la nuesa zona d’una manera más amena, sobre too pa la xente mozo que tovía se resiste a afondar nesti tipu de música y los sos raigaños. Préstanos pensalo como una manera d’axuntar lo tradicional y lo moderno: dos coses que conviven igual de bien na nuesa vida ensin anulase la una a la otra»
Ún de los vuestros vídeos que más sonadía tuvo ye nel que tocáis con Dúo a Tempo, que tien más de 18.000 reproducciones. ¿Qué podéis cuntar d’esta collaboración? ¿Notastis la repercusión en redes sociales na vuestra trayectoria?
Paula y Virginia, de Dúo a Tempo, son pa nós, primero que nada, unes buenes amigues, y amás dos grandes profesionales: basta con echar un güeyu al so perfil d’Instagram pa decatase del ciñu y el procuru que ponen en tolo que faen. Esi videu forma parte d’una pequeña triloxía que suben cada añu pol Día d’Asturies, y esti últimu añu propuxéronnos axuntanos a la collaboración, interpretando’l ‘Son d’Arriba de Xedré’. Aceptamos encantaes, claro. Pa nós foi tamién un escaparate perbonu pa danos a conocer ente más xente, sobre manera teniendo en cuenta que Paula y Virginia lleven yá varios años tocando en tou tipu d’eventos y cuenten con un bon númberu de siguidores gracies a lo bien que faen el so trabayu.
Sois toes del suroccidente asturianu, un territoriu con muncha riqueza en cuantes a la música tradicional. Sicasí, llama l’atención que seais ún de los pocos grupos folk d’esi territoriu que tean furrulando na actualidá… Amás tampoco hai munchos eventos d’esta escena per ellí. ¿Cómo valorais la situación de la música asturiana nel suroccidente?
Llama l’atención que’l gruesu de la música tradicional asturiana venga precisamente d’equí, del suroccidente, y que seya por tanto d’onde beben la mayoría de grupos de baille tradicional y grupos folk de toa Asturies. Sicasí, que nun existan malpenes grupos nesti territoriu qu’esploren esa mesma música tradicional ye un reflexu de la propia sangría demográfica que sufre la nuesa zona dende va años. La mayor parte de la población, si bien tien más de 65 años, amuesa muncho interés pola música tradicional de distintes formes. Asina qu’esti tipu d’iniciatives podrían cuntar con más sofitu municipal y autonómicu, porque paez más fácil desendolcales en zones más cercanes a les ciudaes, onde hai más movimientu cultural y más facilidaes pa ensayar, movese o dase a conocer. Con esto nun queremos decir qu’equí nun se puedan desenvolver proyectos artísticos y culturales, tolo contrario: lo que fai falta ye cambiar la mirada hacia’l territoriu y facelo visible, pa qu’iniciatives como’l Zarréu Fest o’l Prestoso Fest tengan llugar precisamente equí. Ye posible, pero necesítase voluntá.
«Ye cierto que munches vegaes sintióse ente la xente mozo esi tópicu de que la música asturiana ye dalgo aburríu o de vieyos, pero nun pensamos que sea yá’l discursu predominante»
Abéu en Xixón, Rellume en Siero, Algaire en Mieres, vosotres en Cangas… Hai unos cuantos exemplos de xente mozo que ta entamando grupos de música tradicional. ¿Qué opinión vos paez esto?
Paezmos una noticia mui buena, claro. Que xente mozo s’anime a crear grupos de música tradicional ye señal de que’l folclore sigue vivu y de qu’hai un interés real por caltenelu y facelo evolucionar. Cuanta más xente mozo s’anime a esto, más fácil ye que’l repertoriu tradicional llegue a nueves xeneraciones y nun se pierda.
En rellación a esto, el videu promocional del conciertu que dais el domingu titúlase «La música asturiana es una mierda» y los autores discrepen de varios exemplos de frases que se pueden sentir ente la mocedá refiriéndose a la música asturiana como dalgo aburríu o avieyáu. ¿Parezvos qu’esti discursu negativu ye’l predominante ente la xente mozo?
El videu de promoción del conciertu nes Terrazas de Camagüey algama xustamente lo que busca: remuévete daqué, pa bien o pa mal, yá namás cola primer afirmación, y esi «daqué» ye lo que fai que quedes a velo. Ye cierto que munches vegaes sintióse ente la xente mozo esi tópicu de que la música asturiana ye aburrida o de vieyos, pero nun pensamos que seya yá’l discursu predominante. Cada vegada hai más xente mozo, como los mesmos exemplos que mentes, que s’averen a esti repertoriu dende otra mirada, más cercana y con arguyu, y eso ta ayudando a cambiar esi tópicu. El retu ta en siguir amosando qu’esta música puede tar tan viva ya ser tan interesante como cualquier otra.
«Prestaríanos grabar un discu nun futuru non mui llonxanu. En definitiva, queremos siguir compartiendo’l folclore musical del suroccidente pa que s’escuche y se valore y, quién sabe si, a traviés de la so música, dalguien pudiera interesase por venir a conocelo y, por qué non, decidiera quedase»
Dempués de los conciertos d’esti fin de selmana, ¿cuál van ser los vuestros próximos pasos con Otramiente?
Lo que nos mueve ye, sobre sobre manera, l’amistá y l’amor pola música tradicional. Préstanos muchísimo xuntanos a tocar y cantar, porque pa nós nun ye namás un ensayu, ye tamién una escusa pa vese, falar, ponenos al día y de paso caltener vivo dalgo que sentimos como nueso. De cara al futuru próximu, siguiremos coles actividaes de siempre: cantar los ramos de los pueblos (esti añu, como mínimu, el de Castañéu y el de Viḷḷar de Bimeda), y siguir collaborando en propuestes como grabar la música pal próximu documental de l’A.C. El Bail.le entituláu Somos ramo: identidad colectiva en la Parroquia de Bimeda, y dirixíu por Benito Sierra.
Tamién cuntamos con que sigan llamándonos novios de la zona pa interpreta-yos el cantar de boda’l día de la so boda. Esti añu, ente unes coses y otres, tuvimos que decir que non a dalguna actuación, pero yá tenemos les feches apuntaes nel calendariu pal añu que vien, y dalguna más qu’habrá esti añu y que diremos anunciando… Y sí, como decimos, prestaríanos grabar un discu nun futuru non mui llonxanu. En definitiva, queremos siguir compartiendo’l folclore musical del suroccidente pa que s’escuche y se valore y, quién sabe si, a traviés de la so música, dalguien pudiera interesase por venir a conocelo y, por qué non, decidiera quedase.
Suscríbite a les nuestres novedaes
