Cerezal llanza’l videoclip de “Nun me dexes cayer”

Cerezal tán de celebración. A finales d’esti 2023 cumplen 10 años de trayectoria y tán acabante de rematar la xira de La Cereza’l Cielu, álbum col que dieron 40 conciertos per toa Asturies, Lorient, Laussane, Galicia, Castiella, Cantabria… Pa festexalo publiquen el videoclip de Nun me dexes cayer, fechu por Ruboh y David AJ. “Ta grabáu enteru en planu secuencia, ensin cortes nin edición de planos, cola dificultá de que la cámara nun apara de grabar y movese, y son los actores los que se mueven per detrás de la cámara camudando les escenes. Consiguese asina que, por exemplu, apaeza una habitación enllena xente y al siguiente planu tea vacía, o qu’un personaxe salga nun sitiu y, al siguiente planu, salga n’otru de repente”, desplica Gonzalo Pumares, violinista del grupu, sobre’l procesu de grabación y realización d’esta pieza audiovisual.

Cerezal ye un grupu qu’amesta folk, pop, rock y incluso electrónica. La so formación ta integrada por músicos mui destacaos de la escena asturiana que compaxinen la so actividá en Cerezal cola de tocar n’otres bandes pernomaes. Tres debutar con Camín -discu qu’algamó’l Premio AMAS a Mejor Disco Folk-, a finales de 2019 asoleyaron La Cereza’l Cielu. Nél, el grupu caltién la llínea de trabayu en cuanto a les lletres propies y actuales, dando una vuelta de tuerca al soníu, más maduru y cola inclusión de sintetizadores y programaciones, que remata nun viaxe pa públicos non namás avezaos al folk, sinón tamién más poperos, indies o rockeros.

Dexa un comentariu

X