Éric Basset repasa nun llibru cincuenta años de música bretona
Un volume estensu d’apaición recién recueye la historia de la música bretona de les últimes cinco décades. Éric Basset ye l’autor d’esta obra que ta llamada a convertise na gran enciclopedia de los soníos contemporáneos d’aquel país. Nel añu 1972 Alan Stivell publicaba’l discu en directo tituláu Á l’Olympia, col que tuvo un impactu perimportante; esti ye’l puntu de partida escoyíu por Basset pa escomenzar a describir el camín que dende aquel tiempu percorrió la música de Bretaña. El llibru cuenta con abondes semeyes y ilustraciones y un testu áxil que trata en fondura la bayura d’una escena que tanto diba influyir a nivel européu y asturianu, yá que bien de grupos del nuestru país tuvieron como referentes a otros de la llamada península armoricana.
Nomes imprescindibles tán presentes en 50 ans de musique bretonne -títulu del llibru-, dende les emblemátiques hermanes Goadec hasta’l míticu cantautor Glenmor, pasando por intérpretes como Dan ar Braz, Gilles Servat, Alan Stivell, Yann-Fañch Kemener o Denez Prigent, y formaciones como Sonerien Du, Ar Re Youank, Carré Manchot y munches otres; tamién les muyeres tienen el so espaciu, casu de Clarisse Lavanant, Gwennyn, Cécile Corbel, Nolwenn Korbel; otra manera, el rock amerita l’atención con referencies a bandes como Miosec o Les Ramoneurs de Menhirs. Reséñense los grandes hits de la música bretona, ente los que l’autor rescampla «La Jument de Michao» de Tri Yann, «Lambé an dro» de Matmatah o «Du rhum, des femmes» de Soldat Louis, por poner namás tres exemplos. El volume presenta una visión xeneral de la evolución y desarrollu de la música bretona, dende la tradición oral a les últimes tendencies, tratando temes como les fest noz, el folk y toles sos derivaciones, la canción d’autor o’l celtic rock; pa Basset ésta «ye plural, sicasí, la transmisión sigue ehí, con un pie na tradición oral y musical y otru nes esploraciones sonores».
Éric Basset ye orixinariu de los suburbios de París y quedó prendáu de la música bretona depués d’asistir a un conciertu d’Alan Stivell en 1975, a partir d’ehí escomenzó a interesase fondamente por ella hasta convertise nun espertu de la mesma. Foi tamién promotor de conciertos, llevando a bandes como Tri Yann, Diaouled Ar Menez o Gwendal a actuar en dellos quartiers (barrios) parisinos. Posteriormente fundaría’l sellu discográficu Aztec, qu’anguaño ye ún de los más importantes nel estáu francés dedicáu a les llamaes ‘músiques del mundu’, amás de ser responsable de la xestión y representación d’abondos artistes. Esta obra qu’agora asoleya ye una verdadera guía de la música bretona, un trabayu que, de xuru, va ser d’interés pa tolos/es siguidores d’estos soníos equí n’Asturies; una música d’orixe tradicional que meyor supo renovase del mundu.
