« “Como’l mar” tien una carga emocional pergrande y trata sobre un tema que tuvo y tien una incidencia bultable na historia d’Asturies: la emigración»

Esti sábadu 22 d’ochobre a les 22h tien llugar nel Teatru La Llaboral de Xixón la gala final del XIV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Algaire con “Coral y Maera”, Dixebra con “Como’l Mar” y Mostru l’Horru con “Fíu d’un Pueblu”, son los tres grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.

Siguimos el cuestionariu con Dixebra, ún de los grupos fundamentales de la música asturiana. Formaos en 1987 n’Avilés, fueron pioneros en facer rock n’asturianu amestándolo a otres músiques como’l folk, ska, rap, metal, punk o reggae. Tienen publicao 16 trabayos ente los qu’hai discos d’estudiu, directos y EPs y nellos ta escrita bona parte de la historia de l’Asturies contemporánea, con lletres comprometíes que falen de la realidá cotidiana y de problemes llocales y globales.

¿Qué supón pa vosotres la nominación nesti premiu y qué supondría ganalu?

Yá tuviemos nominaos una vez, nel añu 2010, y daquella nun pudo ser; agora volvemos depués de tantos años. Siempre presta que te reconozan el to llabor y, anque creyemos qu’hai que da-y una vuelta a esti gallardón, ye prácticamente l’únicu qu’hai dirixíu a la música fecha nes llingües propies del país. Ganalu significaría que podríemos siguir dando a conocer el nuestru últimu trabayu, Ente la niebla, una obra que pa nós tien tovía munchu percorríu.

¿Por qué escoyistis esti cantar pa concursar?

Paeciónos el más adecuáu pa un premiu d’esti calter, quiciaves ye’l menos políticamente esplícitu de tol discu, llama más a los sentimientos, a la señardá. Pero tien una carga emocional pergrande y trata sobre un tema que tuvo y tien una incidencia bultable na historia d’Asturies: la emigración. Musicalmente tien un ritmu de danza prima que se va rockerizando a midida que trescurre y un estribillu final que permite acabar n’alto’l cantar.

¿Tenéis daqué especial preparao pa l’actuación del sábadu?

De mano, hai que comentar que ye una pieza que nun tocamos en directo, colo que va ser yá una novedá. Van acompañanos a les voces tanto Lluci Palomares (Corquiéu), como Bárbara González-Quevedo (Alienda) y, amás, van tocar tamién la pandereta. El resultáu creyemos que ye dalgo mui potente, col soníu de les panderetes que remite a la tradición y unes guitarres contundentes qu’aporten la fuercia del rock.

Sienti “Como’l mar” de Dixebra y merca merchandising y discos