Grau recuerda la figura del constructor de gaites Diógenes García con delles actividaes

Esti fin de selmana escomiencen les II Xornaes Etnográfiques de Grau, que nesta ocasión van durar hasta’l 15 de payares y van tar dedicaes a recordar y homenaxar al constructor de gaites Diógenes García, que dende los años 80 nel so taller nel barriu de La Tenderina n’Uviéu modernizó la construcción d’esi instrumentu. Conferencies, actuaciones de pernomaos gaiteros y el I Concursu de Gaiteros/es de Gaita Asturiana Memorial Diógenes García dan forma a estes xornaes n’alcordanza d’esti artesanu fináu nel 2020 a los 82 años d’edá.

Diógenes García ye una de les figures más destacaes ente los artesanos y luthiers de la gaita n’Asturies de los últimos cincuenta años; foi autodidacta de formación y destacaba nel manexu de ferramientes y maquinaria, algamando un prestixu bultable ente los gaiteros. Pasín ente pasu, la so técnica constructiva algamó un sellu personal y inconfundible, faciendo que los sos instrumentos tuvieren una calidá incuestionable. Músicos como los hermanos Tejedor o Xuacu Amieva utilizaron y siguen faciéndolo instrumentos construyíos por Diógenes, colos que tienen grabaos dellos discos. Amás d’ello, tamién se dedicó a la restauración de gaites y foi miembru de la Banda de Gaites Naranco.

Depués del so fallecimientu, el taller quedó como él lu dexara, cola ferramienta colocao, con munchos instrumentos -dellos tovía ensin rematar-, los sos planos, estudios y investigaciones nes que taba trabayando, tolos sos recuerdos y un cientu de papeles escritos a mano qu’espliquen el llabor desarrolláu a lo llargo de más de cincuenta años. El sábadu 22 va inaugurase -cola actuación de la Banda Gaites Naranco- una esposición na Casa de Cultura, na que va reproducise’l taller con toos estos detalles y que va tar abierta hasta’l 15 de payares.

El gaiteru Ricardo Soberado, que collabora nestes xornaes, xunto col Conceyu de Grau y la familia del artesanu, va impartir una conferencia‘l 22 d’ochobre a les 17h sobre la vida y obra del maestru Diógenes García. Nes selmanes siguientes, gaiteros, intérpretes y especialistes nel instrumentu van homenaxar al constructor con distintes conferencies y actuaciones. Asina ye como’l sábadu 29, el director del Muséu de la Gaita, Juan Alonso Fernández, va dar la conferencia Panorama de la música tradicional en Asturies l’entamu del Boom de la gaita’ y van actuar Rubén Alba y Nel de Purnea; el 5 de payares Pelayo Fernández y Fonsu Les Regueres falen De los Cogollos a la impresión 3D y llueu va actuar Xuacu Amieva; y el 12 de payares Chus Solís va falar de la Renovación acústica de la gaita desde los años 80 pa llueu dar pasu a l’actuación de la Banda Gaites Conceyu de Grau con músicos convidaos. Toles conferencies son na Casa la Cultura a les 17h y les actuaciones na Capiya los dolores.

Memorial Diógenes García

Pa zarrar les xornaes va facese’l 13 de payares el I Concursu de Gaiteros/es de Gaita Asturiana del conceyu moscón, que va llevar el so nome y va desarrollase na Capiya de Los Dolores.

Discos de gaita na tienda