«Si gana “Fíu d’un pueblu”, sería la primer vegada qu’un grupu rap algama’l Premiu Camaretá»

Esti sábadu 22 d’ochobre a les 22h tien llugar nel Teatru La Llaboral de Xixón la gala final del XIV Premiu Camaretá al Meyor Cantar, l’únicu premiu institucional qu’existe anguaño pa da-y reconocimientu a la música fecha n’asturianu o gallego-asturianu. Algaire con “Coral y Maera”, Dixebra con “Como’l Mar” y Mostru l’Horru con “Fíu d’un Pueblu”, son los tres grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.

Zarramos el cuestionariu con Mostru l’Horru, banda de hip hop n’asturianu fundada en 2021 pol xixonés Fran Méndez y nel que participa’l productor llangreanu Zeros. ‘Señales de Fumu’ ye’l so primer trabayu, un discu rap d’ocho cantares nel que tamién suenen influyencies d’otros estilos como’l reggae o’l rock.

¿Qué supón pa vosotros la nominación nesti premiu y qué supondría ganalu?

Tar nominaos al Premiu Camaretá supón un puxu perfuerte a la visibilidá del proyectu, teniendo en cuenta que’l grupu lleva poco tiempu. Ganalu sedría’l mayor reconocimientu que podriemos recibir y supondría poder espardir el xéneru n’Asturies y fuera. Amás sedriamos el primer grupu de rap en ganalu.

¿Por qué escoyistis esti cantar pa concursar?

Escoyímos “Fíu d’un pueblu” porque yera’l tema más redondu que teníemos nesi procesu de confección del discu. Tamién porque la lletra yera la más afayadiza pa presentanos en sociedá.

¿Tenéis daqué especial preparao pa l’actuación del sábadu?

Nun quiero dicite nin que sí nin que non…(rises) Daes les distancies xeográfiques ente Zeros y yo, namás podremos ensayar el día anterior y vamos probar un par de coses nueves a ver cómo queden.

Sienti “Fíu d’un pueblu” y merca’l discu

Dexa un comentariu

X