Conciertos en Corvera, Uviéu, Xixón y Ribeseya pa baillar nel Día d’Asturies

Esti xueves ye’l 8 de setiembre, Día d’Asturies, y dempués de dos años d’andanciu y de restricciones sanitaries, la música en vivo vuelve a garrar protagonismu pa cellebrar el día’l país. Corvera y Xixón acueyen actos pol 8 setiembre que programen conciertos; y en Ribeseya y Uviéu, amás d’en Xixón, va haber conciertos que formen parte d’otres programaciones culturales, pero que coinciden en que van facese a lo llargo d’esti día festivu. El resultáu: catorce actuaciones musicales pa echar en día baillando.

El Gobiernu del Principáu d’Asturies vuelve a cellebrar los actos oficiales del 8 setiembre, qu’esti añu son en Corvera. D’esta manera, va haber una montonera actividaes a lo llargo del día nes que la música n’asturianu tien protagonismu gracies a les actuaciones d’Algaire (a les 13.30h nel Parque de La Güelga de Cancienes), Anabel Santiago (a les 18h en La Lechera de Cancienes), Chus Pedro y Pipo Prendes (a les 19.30h nel Anfiteatru del Parque d’Europa de Les Vegues) y Los Berrones (a les 22.30h nel Prau de La Fiesta de Les Vegues).

En Xixón continúa la programación del Festival Al Resve cola puesta n’escena del espectáculu Restolando de David Varela, a les 13h na Plaza la Soledá, y de Burbús a les 20.30h na Plaza Xovellanos. El Múseu del Pueblu d’Asturies de la villa tamién va acoyer un conciertu de Felpeyu a les 14h dientro de los actos programaos por Podemos Asturies pa festexar el 8 setiembre. Felpeyu van tocar tamién na Folixa la Sidre de Ribeseya dende les 21.30h xunto a Abéu y Baxel. Nesti eventu actúen tamién Los Gascones pa la hora’l vermú.

Per último, el chigre cultural Lata de Zinc ta tou esti mes de setiembre cellebrando’l so aniversariu con delles actividaes. Pa esti xueves 8 setiembre la música asturiana va restallar dende les 20h cola electrónica de raigañu de Llevólu’l Sumiciu y a la techno-tonada de Paganéu Live. Amás, pal 11 de setiembre esta sala uviedina tamién programó pa les 13h un vermú en danza con una sesión de Fruela 757, taller de Les Pites y Fañagüeta DJ.

*Semeya d’Una Señora Fiesta 2022.