La gran fiesta del rock astur

La espectación xenerada nos díes anteriores facía prever una bona asistencia, pero la realidá superóla llargamente, convirtiéndose nun eventu masivu. Y ye que’l conciertu d’Ochobre, Skama la Rede y Dixebra nel festival uviedín Kuivi PopUp va quedar nel recuerdu como ún de los momentos cimeros del rock en llingua asturiana. Que la respuesta popular fuere tan positiva muestra la consistencia y la madurez d’una escena que, por fin, paez afitada y fai parte por derechu propiu de la escena musical del país.

Esti movimientu, catalogáu xeneralmente como Rock Astur, funde los sos raigaños n’antecedentes como Asturcón -pioneros na utilización de la gaita nun contestu rockeru- o Güextia -con un soníu potente onde la mandolina aportaba’l timbre folki-; con estes blimes surde en 1987 la banda crucial pa esplicar y entender esti fenómenu: Dixebra. Ellos pondríen les bases d’un estilu caracterizáu pola mecigaya sonora (rock, punk, ska, reggae, folk…), la inclusión de la gaita como un instrumentu que-y da personalidá y unes lletres averaes a la realidá político-social asturiana dende una perspectiva crítica. Habría otres bandes que tamién dexaríen buelga como Karne Antisocial o Asturtralla, pero especialmente hai que nomar a Avientu, recordaos con ciñu y respetu poles xeneraciones nueves que s’incorporen al movimientu. Nel añu 1996, el cantante de Dixebra, Xune Elipe, recoyería nel llibru Llingua y rock la pequeña pero intensa historia del rock en llingua asturiana, recuperando tolos antecedentes del mesmu hasta esi momentu.

«El Rock Astur ye un estilu caracterizáu pola mecigaya sonora, la inclusión de la gaita y unes lletres averaes a la realidá político-social asturiana dende una perspectiva crítica»

Los años 90 foron tiempos de dir perfaciendo esti estilu, nellos surdieron otres bandes de vida efímera que normalmente nun llegaríen a dexar nada grabao del so llabor. Pero nos primeros años del mileniu nuevu apaecen bandes como Gomeru que llegaríen a rexistrar un par de discos y publícase un discu que certificaría que les coses taben cambiando, falamos del tituláu Rock’n’llingua (2003) y presentáu como ‘Compilatoriu de Rock Astur’, onde seis bandes mostraben la unidá y la voluntá d’existir d’un movimientu que, pasu ente pasu, diba asomando la cabeza y reclamando’l so llugar nel panorama musical asturianu. D’esta manera, con estos precedentes, foi surdiento una etiqueta cola qu’axuntar a unes bandes con característiques comunes -pero caúna cola so propia personalidá- y da-yos visibilidá.

Otra de les formaciones fundamentales en too esto ye Skama la Rede, encargaos d’abrir el conciertu nel Kuivi y convertir dende’l primer momentu’l solar asitiáu nel vieyu HUCA nuna pista de baille col so característicu ska-punk. Yá tienen la so particular parroquia que coria al altu la lleva los estribillos de cantares como «Internacionalista», «Campu de batalla» o «Villaska», mentanto Burilo arenga al públicu coles sos soflames. Ufiertaron un directu ensin tregua nin concesiones a los tiempos medios, que caleció a los y les asistentes preparándolos pa la nueche que s’avecinaba.

Darréu xubiríen al escenariu unos mui mozos Ochobre que yá escomiencen a facese un nome nesta escena, con un únicu discu publicáu y un soníu punk-folk; destaca la presencia de dos muyeres (cantante y gaitera) na so formación, lo que los singulariza y muestra la incorporación femenina al rock n’asturianu. Sonaron contundentes anque en dellos momentos el soníu nun fuere tolo bono que sería esperable, rescampla la voz gruesa y resgada de Raquel que-y da un aquello orixinal y, en cierta manera, sorprendente. Dos foron los momentos significativos de la so actuación, el primeru cuando fixeron la versión del grupu valencianu Obrint Pas titulada «Somos», acompañaos por cinco gaiteros, ente ellos Llorián (Dixebra) y Xandru (Skama la Rede); pero especialmente resultó mui simbólica la interpretación del tema d’Avientu «Llicenciáu en barricaes» cantáu a comuña ente Raquel, Burilo y Xune, tou un chisgu al Rock Astur y la so reivindicación.

La nueche zarróla Dixebra que, como ye vezu nellos, dende’l primerísimu momentu conectaron fondamente col públicu. La folixa foi constante a lo llargo de la so actuación col pogu, el mosh (blincar dende l’escenariu al públicu), la danza y hasta dalgún baille tradicional como protagonistes. La so mecedura d’estilos, qu’interpreten prácticamente ensin interrupciones, fai de los sos directos un espectáculu ensin fuelgu, dinámicu y intensu. Les referencies a l’actualidá local uviedina foron recurrentes por parte de Xune (ronda norte, fábrica de La Vega, fiestes de San Mateo…), dalgo que’l públicu acoyó con simpatía y muestra l’apegu de la banda a la realidá social de cada momentu. Probablemente ún de los grandes aciertos de Dixebra seya’l que nun s’estancaron nin cayeron na ‘señardá’ tocántenes al so repertoriu, anovándolu a lo llargo de les más de tres décades de vida, dalgo a tener en cuenta a la d’analizar y esplicar el so éxitu y vixencia. D’esta manera, nel Kuivi ufiertaron un set list onde primaben les composiciones inxertaes nel so últimu trabayu, Ente la niebla, anque nun faltaron tampoco dellos de los sos himnos como «Nun llores», «Da-yos caña» (interpretáu a dúu con Burilo) o «Mañana fría», que proporcionaría otru de los momentazos del conciertu al axuntar na so interpretación a Natalia (gaitera d’Ochobre), Raquel (cantante d’Ochobre) y Maxi Compán (cantante y guitarrista de Fe de Ratas). L’apoteósis final llegaría con «Canciu d’amor» y un públicu entregáu dafechu que quería más y más d’una banda que demostró tar en plena forma.

Esa tarde-nueche del xueves nel Kuivi PopUp producióse una catársis colectiva alredor del rock en llingua asturiana qu’insufló moral y esperanza a los y les asistentes en tiempu de batalles culturales, de revisionismu políticu y amenaces sociales. El compañerismu y fraternidá ente los miembros de les bandes participantes tresmitióse al públicu y dio imaxe d’unidá, dalgo fundamental pal Rock Astur si quier tener incidencia y futuru. Otra manera, el movimientu de reivindicacióin llingüística y los y les falantes d’asturianu precisen de referentes nos qu’espeyase, ye necesario crear comunidá, códigos internos nos qu’autorreconocese y interrellacionar. El rock, al traviés de bandes como les participantes nesti conciertu, o d’otres como La Tarrancha, Skontra o Misiva, ta facilitando crear esa sensación de comunidá, imprescindible pa la supervivencia d’un idioma. Como se pudo comprobar, el Rock Astur tien yá un públicu bultable (como diría Burilo: «El rock n’asturianu tamién enllena esplanaes») y cada vez más procuru llingüísticu y enfotu n’ufiertar lletres nun asturianu amañosu y reconocible.

«El rock ta facilitando crear esa sensación de comunidá, imprescindible pa la supervivencia d’un idioma»

Lo acontecío nel Kuivi habría de facer reflexonar a los programadores, organizadores de festivales y responsables culturales asturianos, yá nun pueden siguir dando’l llombu a una realidá como la del rock en llingua asturiana, que tien capacidá de movilización y una calidá al altor de cualquier otra escena. Nel ambiente d’esa tarde-nueche tan especial flotaba nel aire una entruga ente los integrantes de les bandes y el públicu asistente: «¿En viendo la respuesta popular, pa cuándo un gran festival del Rock Astur?».

Testu: Redacción | Semeyes: Pablo Fernández..

Discos de rock n’asturianu a la venta na tienda