El festival Al Resve lleva a Cimavilla dieciséis conciertos

Per tercer añu consecutivu, vuelve el festival Al Resve a les places y cais de Cimavilla. Del xueves 7 al domingu 11 y del vienres 16 al domingu 18 de setiembre, el barriu altu de Xixón va acoyer les dieciséis actuaciones de música tradicional y familiar programaes nesti eventu qu’entama la Fundación Municipal de Cultura. Destaca amás qu’esta edición coincide coles fiestes del propiu barriu, siendo un complementu más del programa festivu y cultural que va vivir per dos selmanes l’históricu barriu playu.

«Al Resve ufierta a quien quiera averase a esti barriu emblemáticu un programa d’actividaes diversu, folixeru y atentu a la sensibilidá y a les preferencies de tolos públicos, onde caben dende la reciella a la xente de más edá», comenten dende la organización d’un eventu que va aportar a cuatro escenarios asitiaos en places de Cimavilla: La Soledá, Xovellanos, La Corrada y Arturo Arias.

La programación yá ta disponible na web del Ayuntamientu y va ta formada pol conciertu inaugural d‘Anabel Santiago -el xueves 7 a les 22h na Plaza La Soledá-; los conciertos pa tola familia col espectáculu Restolando de David Varela -xueves 18 a les 13h na Plaza La Soledá- y Alicia Álvarez -sábadu 10 a les 13h na Plaza La Corrada-; y la música tradicional de Burbús -xueves 8 a les 20.30h na Plaza Xovellanos-; Algaire -viernes 9 a les 20.30h na Plaza Arturo Arias-; Urso Dakoff -sábadu 10 a les 20h na Plaza La Soledá-; 6 Riales -domingu 11 a les 19h na Plaza Arturo Arias-; Héctor Braga -vienres 16 a les 20.30h na Plaza La Corrada-; Calea -sábadu 17 a les 20h na Plaza Xovellanos-; Pandereteres de Fitoria -sábadu 17 a les 21h na Plaza Xovellanos-: y Baxel -domingu 18 a les 19.30h na Plaza La Corrada-.

Amás, tamién va haber espaciu pal baille tradicional cola actuación de Xeitu -sábadu 10 a les 21h na Plaza La Soledá-; pal folk más mozo representáu pola Escuela de Música Tradicional El Trubiecu y Abéu -domingu 11 a les 13h na Plaza Xovellanos-; pa la bandina popular Los Gascones que va percorrer les cais de Cimavilla’l domingu 18 dende les 12h y pa la canción d’autor enllena de retranca de Jerónimo Granda, qu’actúa’l domingu 18 a les 13h na Plaza La Soledá. Una programación bayurosa pa «esfrutar del buen facer de los y les artistes y creadores» del país.

Comprar discos folk na tienda online