Conciertos poles Lletres Asturianes y la oficialidá

Esti fin de selmana remata la Selmana de les Lletres Asturianes y con motivu d’ella va haber dellos actos acompañaos d’actuaciones musicales. N’Uviéu toquen Misiva‘l vienres 6, Algaire‘l sábadu 7, el sábadu tamién ye’l Conciertu de les Lletres de Llanera con La Bandina’l Tombo, Felpeyu y N’Arba; y el domingu 8 Fontoria actúa en Mieres.

Los conciertos entamen el vienres 6 de mayu, a les 12h nel Teatru Campoamor d’Uviéu, col actu del Día de les Lletres que fai l’Academia de la Llingua Asturiana y nel que van actuar la banda punk-rock Misiva. El sábadu 7 de mayu a les 12h sal de la Estación del Norte d’Uviéu la manifestación pola oficialidá convocada pola Xunta Pola Defensa de la Llingua Asturiana y, cuando remate na plaza La Escandalera, van actuar el les pandereteres Algaire.

D’Uviéu a Llanera. El sábadu 7 el conceyu entama’l Conciertu Les Lletres nel destaquen les actuaciones de grupos a los que nos últimos años ye difícil velos en directo. N’Arba -banda de cultu del folk asturianu formada en 1997 por Xosé Ambás- suel dar namás da un conciertu al añu y La Bandina’l Tombo -cuartetu de música tradicional pal baille qu’interpreta pieces del fin del sieglu XIX y primeros del XX- tien la so actividá nun segundu planu por mor de que los sos componentes toquen n’otra montonera de proyectos musicales. Amás d’ellos van tocar Felpeyu. Estes actuaciones van ser nel Aparcaderu de la Casa la Cultura de Pondal (Llugo) y los horarios son La Bandina’l Tombo a les 21h, Felpeyu a les 22.30h y N’Arba a la medianueche.

Por último, Fontoria van actuar el domingu 8 a les 20h nel Auditoriu Teodoro Cuesta de Mieres, dientro de los actos qu’entama esi conceyu pa festexar la 43 Selmana de les Lletres Asturianes. El grupu de folk progresivu va aprovechar la ocasión pa presentar el so tercer trabayu publicáu rencientemente, ‘Sirio’.

Merca los discos de los grupos que van tocar