Conciertos, talleres y festivales esti fin de selmana

Una montonera de conciertos y talleres enllenen l'axenda musical asturiana esti fin de selmana, con cuatro festivales en Xixón, Mieres, Soto Rei y Llanes

Eventos

Xunu entama con un fin de selmana d’esos nos que tenemos qu’escoyer, porque hai eventos simultáneamente repartíos perdayuri. Arrancamos el vienres 6, nel que van tener llugar en Soto Rei los Alcuentros de Música Tradicional n’Alcordanza d’Aurelio Argel. Vamos poder esfrutar de los conciertos de La Xarangana y Los Berrones, a partir de les 21:00. Esa misma tarde, en ne Parque Fluvial de Viesques, dientro del festival Xixón Folk, entama les 23:30 una nueche en danza, con Soi Panderetera, GF Trebeyu y L’Andecha Turcipié, amás d’escenariu abiertu n’acabando estos grupos. La ufierta nun acaba equí, porque nel oriente d’Asturies, en Porrúa, entama tamién la X.O.T.A, onde tenemos taller con informantes, espicha y nueche en danza.

El sábadu ye’l día grande del fin de selmana, con programación asgaya nestos tres festivales. Nos Alcuentros de Soto Rei, talleres y conciertu didácticu de David Varela a partir de las 13:00, y pela nueche, conciertos a partir de les 21:00, y nellos tarán presentes Pandereteres de La Ribera, Banda Gaites Fonte Fuécara, Banda Gaites Soto Rei y La Bonturné

Nel Xixón Folk, amás d’una programación mui variada con talleres, pasucáis de bandes de gaites, actuaciones de bandines, etc., van tocar Felpeyu y La Tarrancha a partir de les 00.00 de la nueche.

Na X.O.T.A, talleres pela mañana, y pela tarde, a partir de les 17:30, en La Portiella (Llanes), actuaciones del Grupu Folclóricu Trebeyu (Xixón), l’Asociación Belenista la Morana (Zamora), el Grupu Etnográficu l’Oriente y les pandereteres tradicionales Soltxu, Cris Zagaleja y María Vázquez con Marga Lorences. N’acabando, va dase pasu a los conciertos del Ringorrango, L-R (con un conciertu especial acompañáu de invitaes) y Ailá.

Tamién el sábadu va tener llugar la cellebración del 25 aniversariu de Vezos Astures, con ponencies pela mañana y tarde en danza, nel Muséu del Pueblu d’Asturies. Per otru llau, el Grupu de Bail.le Ruxidera organiza la XIV edición del so Festival Ruxidera, a les 18:30 nel auditoriu Teodoro Cuesta de Mieres que va cuntar, amás de cola so actuación, col grupu de baille La Folixa de Carreño y l’agrupación folclórica Rosa del Azafrán de Ciudad Real.

Ya pasando al domingu, va cellebrase la 2ª semifinal del XIII Concursu de Canción Asturiana Conceyu Siero, a les 11.30 nel Teatru Auditoriu de la Pola (Siero). Tamién en Pola Siero, xustu p’acabar nun eventu y enllazar con otru, Ún de Grao va facer un conciertu a les 13:30 na Taberna Cuévano, tamién en La Pola Siero. Y sigui la programación nel Xixón Folk, con talleres y actuaciones a les 12:30 Grupu Folklóricu Esbardu, d’Avilés, y a les 13:30 de la Bandina Los Trimendos. Pela tarde, a les 20:30, conciertu de Rollu Folk.

Tola programación detallada d’equí a los próximos meses pue vese na Axenda de Musicasturiana.com.