El Parque Fluvial de Viesques sedrá de nuevu l’escenariu d’esta segunda edición del Xixón Folk, entamáu dende la Banda Gaites Saxum. El festival anuncia esti añu una programación más que completa, cola música como protagonista, pero amosando una bona variedá d’actividaes ya espectáculos. Dende mercáu tradicional, animación a pie de cai, multitud de talleres, y dalguna propuesta más que de xuru sorprenderá: vamos desgranar esta programación que nun dexa indiferente a naide.
Entama’l festival el vienres 6 de xunu a les 17:00, con un mercáu tradicional nel que va haber muestra d’oficios tradicionales (alfarería, cestería, azabache, talla de maera, telar, madreñes, etc.), nel mesmu horariu, pal que se quiera animar, una bona ufierta de talleres de baldre: cerámica, joyería, cantería y llana y fieltru. Nun podía faltar la música, asina que podremos esfrutar d’animación musical a cargu «d’El Hombre Orcresta».
A les 19:00, Alberto Rodríguez sedrá l’encargáu de dar el pregón, y a les 19:30, vuelta a l’animación, esta vegada, con temática mitolóxica, y a les 20:00, l’espectáculu de «Antoine, el títere pintor», que de xuru dalgún tuvo’l placer de ver yá peles cais de delles ciudaes asturianes.
Pa dir caleciendo de cara a la nueche, a les 20:30 el Grupu Folclóricu Trebeyu va tar poniendo un taller de baille tradicional, tamién de baldre. Un pasucáis de bandes de gaites pel Parque Fluvial prenderá la lluz d’esta primera nueche (lliteralmente, pues van cuntar con antorches pa desfilar). Yá a les 22:00, la bandina Los Collaínos amenizará la cena, y a les 23:30, entama la nueche en danza, con Soi Panderetera, GF Trebeyu y L’Andecha Turcipié, amás d’escenariu abiertu n’acabando estos grupos.
El sábadu 7, abren el día’l mercáu tradicional y nuevos talleres de baldre, esta vegada de cantería, cestería y ellaboración de sidra dulce, too a partir de les 11:00. Amás, de 11:00 a 13:00, hai muestra de xuegos tradicionales y antiguos. De nuevu, l’animación musical cuerre a cargu d’El Hombre Orcresta. Hasta las 13:00 tamién va a poder participase en talleres d’instrumentos tradicionales, joyería y llana y fieltru. Xusto en acabando, a la una, sesión vermú y xinta con Los Gascones, y animación con «Antoine, el títere pintor»
Pela tarde, a les 16:15, estrénase l’espectáculu «Circo Astur«, siguíu de l’actuación de Bandina Astur a les 17:00. De cinco a siete de la tarde, más talleres, de cerámica, joyería y pintura, y a partir de les siete, espectáculos d’animación.
Ya pensando na nueche, habrá otru pasucáis de bandes de gaites peles cais de Viesques, y a les 20:30, cena con animación d’Orquestina La Xarangana. A les 22:00, alcuentru de bandes de gaites, con BG Conceyu Xixón, BG Xurbeo, BG La Kadarma, BG El Penedón y BG Saxum.
A les 12 entamará l’espectáculu «Cantos de Fuego», y a les 00:30, nueche folk, colos esperaos conciertos de Felpeyu y La Tarrancha
Pal domingu 8 entá queda programación asgaya: dende les 11:00, mercáu tradicional y talleres artesanales de baldre, amás d’animación musical y xuegos tradicionales. A les 12:30, actuará’l Grupu Folklóricu Esbardu, d’Avilés, y a les 13:30, la Bandina Los Trimendos.
Como sorpresa, a les 19:00 ufiértase un espectáculu de cetrería medieval, que va preceder a l’actuación del grupu Rollu Folk a les 20:30
Durante too’l festival va haber zona de restauración, mercáu y atracciones pa la reciella. La programación completa puede consultase nel Instagram del festival, que vos dexamos equí debaxo. Puedes acceder nel enllaz o faciendo click na imaxen.
Suscríbite a les nuestres novedaes
