Esti vienres 8 de payares a les 19h tien llugar nel Teatru La Llaboral de Xixón la gala final del XVI Premiu Camaretá al Meyor Cantar, l’únicu premiu institucional qu’esiste anguaño pa da-y reconocimientu a la creación orixinal de música fecha n’asturianu o gallego-asturianu. La Bonturné con «Odisea la nuí«, Susana Gudín con “Contigo“, Ferla Megía con “Medrana a Medrar“ y Héctor Braga con “Llobatu“, son los cuatro grupos y cantares nominaos nesta edición. Dende musicasturiana.com vamos falar esta selmana cada día con ún de los artistes nominaos pa conocer por qué escoyeron esi tema, si tienen preparao daqué especial pa la final y qué supón participar nesti certame.
Siguimos el cuestionariu con Susana Gudín. Según recueye la web oficial del Camaretá «é úa artista multidisciplinar qu’enfoca a súa carreira principalmente nel canto llírico, pro desenvólvese tanto neste campo como na locución, narración y cualquera outra clas d’uso profesional da voz, ademáis de na interpretación y na danza. Dentro da súa trayectoria vocal abarca estilos musicales variaos y lleva adelantre a producción de dalgús proyectos. Entre ellos, a composición d’un trabayo ben personal dentro del que tenta d’esplorar llinguas distintas en estilos cos que nun se relacionarían normalmente».
¿Qué supón pa ti la nominación nesti premiu y qué supondría ganalu?
Pra min a nominación xa é un premio, porque fer úa canción con úa lletra tamén propia, que daquén pensa que merece tar na final, é xa un reconocemento al tou trabayo. Qu’a canción gane el premio supón a oportunidá de poñer en marcha un proyecto que pra min é importante… Vai ferse igual, peró col premio a facilidá iba ser muito mayor.
¿Por qué escoyisti esti cantar pa concursar?
«Contigo» é a primeira canción d’un proyecto que ta na mía cabeza hai anos. Fíxose realidá condo escribín a primeira estrofa. Ei toméi a decisión de presentar al premio a canción. Despós chegaron outras cancióis, peró esta é a porta qu’abrín pra cumprir un soño.
¿Tienes daqué especial preparao pa l’actuación del domingu?
El venres vamos procurar que se note a enerxía que ten «Contigo». Pra nosoutros é xa úa canción especial… peró así, entre tu y eu, especiales van ser os zapatos que vou poñer.
Suscríbite a les nuestres novedaes
