Va dieciséis años, Xel Pereda y Nacho Vegas xuntáronse nun proyectu conxuntu qu’anticipó l’amiestu de lo tradicional y lo contemporáneo; daqué qu’anguaño ye mui común tanto nes novedaes discográfiques d’Asturies, como n’otros territorios. El resultáu foi un álbum pioneru d’once cantares col mesmu nome que’l grupu que formaron, Lucas 15, asoleyáu a entamos de 2008 con Lloria Discos. Con Lucas 15 siguimos la estaya de discu del mes; na que vamos dir analizando dalgunos de los trabayos discográficos más destacaos de la música asturiana y acompañándolos d’una ufierta na tienda online.
Amás de Xel Pereda (guitarra, banjo, mandolina y voz) y Nacho Vegas (voz y guitarra), Lucas 15 tamién son -o yeren- Manu Molina (batería y percusiones). Luis Rodríguez (baxu) y Chus Naves (órganu, pianu y coros). Nel discu collaboraron Montse Álvarez, Fredi García, Dudu Puente, Javi Fernández, Xentiquina y les formaciones vocales Voces de Cimavilla, Orfeón Gijonés y Ochote Arbeyal. Sacante «Los fayeos de Mayo» -composición d’Ígor Medio-, «El Diciembre, mes glaciar» -música de Xel Pereda- y «El Sacaúntos de Allariz» -música de Nacho Vegas-, tolos temes son tradicionales, adaptaciones del grupu d’agarraos, aguilandos, romances y otros cantares en clave pop-rock alternativu. Destaquen especialmente les combinaciones de testures nes partes instrumentales y l’emplegu de los coros. Los músicos foron capaces de captar la esencia de les melodíes y los testos tradicionales pa revisitalos con una sonoridá estremada del orixe.
Lucas 15 puede sentise en toles plataformes musicales, teniendo en cuenta’l fallu d’orde de los títulos que sufre’l discu en Spotify. Anque les pistes sí tán organizaes correutamente, los nomes de los cantares apaecen camudaos y nun se correspuenden coles melodíes que suenen:
La continuidá del proyectu frayó en 2016 cola anuncia de que nun diba salir l’esperáu segundu discu que prometieren. Sicasí, Lucas 15 esconsonó con un conciertu a solu de Xel Pereda nel ciclu Encaja2 del Teatru Xovellanos n’avientu del añu pasáu. Una cita pa la que recuperó la so versión de «Los fayeos de Mayo» y una parte instrumental de «Nel campu nacen flores», y qu’intercala composiciones propies inédites, instrumentales basaes en cantares populares y tonaes, y les sos reinterpretaciones de les melodíes y lletres populares del país. El músicu consigue algamar una intimidá que trespasa la pantalla, con unes igües de guitarra interpretaes de manera maxistral y cantando cada una de les pallabres dende la sensibilidá. Axallá podamos volver sentir a Lucas 15 en dalgún de los dos formatos, una creación qu’aportó una nueva manera de pensar les melodíes tradicionales.
Suscríbite a les nuestres novedaes
