El Gobiernu d’Asturies punxo en marcha dos nueves llinies d’ayudes, con una dotación total de 200.000 euros, pa sofitar proyectos destinaos a recuperar, caltener y esparder la cultura tradicional asturiana. Ente los ámbitos que podrán beneficiase d’estes subvenciones atópase’l folclor y, de manera directa, la música tradicional, el baille y la lliteratura oral.
Les ayudes, impulsaes pola Conseyería de Cultura, Política Llingüística y Deporte, dividiránse en dos convocatories de 100.000 euros caúna. La primera ta dirixida a los conceyos y los sos organismos autónomos, mientres que la segunda va tar destinada a asociaciones culturales, fundaciones culturales d’interés xeneral y otres entidaes ensin porgüeyu económicu.
Nel casu de la música, esta convocatoria abre la puerta a iniciatives de recuperación y investigación del patrimoniu sonoru, a proyectos de documentación y divulgación o a propuestes que contribuyan a garantizar la tresmisión interxeneracional de los repertorios y saberes de la tradición asturiana. La música apaez, asina, como ún de los siete grandes ámbitos nos que se van poder presentar proyectos.
Cada entidá va poder presentar un máximu de dos proyectos. Les entidaes locales podrán recibir hasta 15.000 euros por iniciativa, con una financiación que podrá llegar al 90% del presupuestu aprobáu, mentanto que nel casu de les asociaciones y entidaes ensin porgüeyu económicu la cuantía máxima va ser de 6.010 euros. Na valoración van tener un pesu especial el interés de la propuesta, la corrección llingüística, la esperiencia de les persones responsables y la incorporación de la perspectiva de xéneru.
Suscríbite a les nuestres novedaes
