Herbamora, la banda formada por cinco muyeres percusionistes y cantantes venceyaes a la cultura tradicional tornaron, dempués de 11 años de parón, con 286 llunes, un EP enllenu de presencia y sensibilidá integráu por cinco cantares nos que les percusiones, el xuegu de voces y la electrónica son protagonistes. Elles revolucionaron en 2007 el mundu de la pandereta asturiana col discu ¡Sali, L.luna!. Fueron les pioneres en llevar esti instrumentu a sonoridaes nunca enantes esperimentaes, fusionando la música tradicional con electrónica, jazz o rock. Cuasique un mes dempués del so últimu llanzamientu, asoleyamos esta estrevista con una de les sos componentes, Paula Cristóbal Caso, na qu’afondamos nesti discu, la so trayectoria y la so visión sobre dellos aspectos de la pandereta, l’ámbitu de la música tradicional y la industria musical n’Asturies.
¿Por qué tuvistis estos 11 años ensin sacar un CD y malpenes con actividá? ¿Qué supone pa vosotres esta vuelta?
Contestualizando un poquiñín lo que ye Herbamora, somos un grupu de compañeres pandereteres. Nenguna de nosotres somos profesionales de la música, sinón que caúna tenemos les nuestres profesiones y, amás, tocamos la pandereta polo que supón pa nosotres y pal colectivu. Nestos 11 años dempués de sacar l’EP N’Acústicu en 2013, tuvimos tocando unos años con Elías y, primero, con Marcos García y, dempués, con Marga Lorences. Nel 2019 entramos nuna llavadora personal y vital. Tres de les compañeres d’Herbamora fuimos madres esi añu y, al mesmu tiempu, a finales de setiembre, perdimos a Elías, morrió’l nuestru compañeru. Eso foi una sacudida grande no personal y dedicamos el nuestru tiempu, fuera de lo profesional, munches, a criar y otres, a desarrollase n’otros ámbitos profesionales.
Nel homenaxe a Elías en 2022 foi la primer vez que volvimos tocar xuntes y… wow. Nesos cuatro años de parón, de silenciu colectivu, teníen pasao munches coses no personal que nos ficieron medrar n’amor propiu y sentir que l’amor colectivu siguía mui fuerte. Muncha ilusión de realcontranos y muncha gana de volver a empezar. Colos temes que yá teníemos pensaos -munchos d’ellos llevaben na recámara años, como la siega de Riballagu de Sanabria, que yera un tema que nos prestaba muncho-, volvimos a contautar con Ruth Suárez, que yera la nuestra profe de cantu, arreglista del discu y productora, y entamamos a trabayar xuntes. Repensamos les lletres que tábemos cantando, dando una vueltina sobre too al amor románticu, que ye un tema central dientro la música tradicional asturiana. Nel discu hai un par de lletres que son tradicionales, una fala de desamor y otra de soltar -ser quien a desprendenos d’esos amores que nun nos van bien-, una carga d’amor propiu importante.
«Nel homenaxe a Elías en 2022 foi la primer vez que volvimos tocar xuntes. Nesos cuatro años de parón, teníen pasao munches coses no personal que nos ficieron medrar n’amor propiu y sentir que l’amor colectivu siguía mui fuerte»
¿Pues afondar en caún de los cantares?
En 286 Llunes nun ye nenguna casualidá que nel primer tema del EP, la primer voz que suena ye Concha’i Clara, que ye Concha de Tresmonte, la güelina d’Elena -amás, nel llibretu, la semeya d’Elena acompaña’l cantar-. Llámase ‘Lluna de sangre’, y apaez ella cantando y falando. Pa nosotres ye un allegatu a la vida cenciella, non simple -porque’l trabayu nel campu nun ye simple, ye una vida complexa-, pero sí a la vida cenciella, onde ella cunta que pasaba’l día cantando, siempre cantando. Ye una declaración d’intenciones pa lo que vien nel restu del discu.
El segundu tema llámase ‘Lluna de flores’, que pa nosotres ye un tema mui emocionante. Hai un son d’arriba de Cangas, de Murias de Puntarás, y nel estribillu suena una composición de Ruth. Emocionámonos tremendamente cantándolu. Dempués vien ‘Lluna de collecha’, el tema que sonó como single, que ye la siega de Riballagu. Entama col cantar tradicional, cantáu a capella, y d’ehí sal una melodía nueva con otros ritmos. Pa cualesquiera que nos conoza, pue ser impactante escuchalo de primeres. Amás, ye un tema que fala del desamor, de reconocer una parte humana, poder soltar y qu’esto nos faga medrar.
La cuarta ye ‘Lluna de lloba’, que ye’l cantar nel que, a traviés d’una lletra tradicional que fala del amor románticu, podemos desfacelu y deprender. Hai un momentu del tema onde la lletra diz «agora nun quiero más qu’escaicer esa condena, tener fuelgu y amor propio y ser la mio única dueña». Hai un allegatu total al empoderamientu y l’autodeterminación. La última, que ye ‘Eclipse total’, un l.lixeru de Payares, que nos paez un tema allegre, con una lletra nuestra que pretende ser tradicional. Una reivindicación al cantar y al baillar como formes de lliberación, de xunión, de xuntanza, de medrar, de crear pueblu y facer comunidá.
«’Eclipse total’ ye un l.lixeru de Payares, que nos paez un tema allegre, con una lletra nuestra que pretende ser tradicional. Una reivindicación al cantar y al baillar como formes de lliberación, de xunión, de xuntanza, de medrar, de crear pueblu y facer comunidá»
¿Qué hai detrás del nome del discu, 286 llunes? ¿Cómo surdió?
286 llunes son les que llevamos dende qu’entamamos a cantar xuntes, dende’l 2003 hasta agora. Bono, hasta l’añu qu’entra, porqu’esti añu yeren 273 y gustábanos más 286. Amás, el primer discu foi ¡Sali, L.luna!, asina que la lluna nos persigue permanentemente.
«286 llunes son les que llevamos dende qu’entamamos a cantar xuntes dende’l 2003 hasta agora»
Ruth Suárez ye la productora y compositora del discu, ¿quién ye? ¿Por qué decidistis trabayar con ella nesti proyectu? ¿Cuála ye la so mayor aportación?
Dempués del discu de 2007, ¡Sali, L.luna!, nosotres cantábemos tal cual nos salía y dímonos cuenta de qu’un poconín de conocimientu musical veníanos bien como grupu. Empezamos a dar clase de cantu con Ruth nel 2010, más menos, y con ella ficimos l’EP N’Acústicu en 2013. Sentíemos la necesidá de dexar un documentu de testimoniu del momentu nel que tábemos, que yera cuando tocábemos con Marcos García y Elías García -que ficieron los arreglos instrumentales-, y Ruth fizo les igües vocales de los temes que yá grabáremos nel discu anterior, pero revisaos d’una forma nueva dafechu, con otra visión.
En 2022, cuando volvimos xuntanos, yá veníemos trabayando con Ruth dalgún tema, pero volvimos a retomar en serio la idega de trabayar con ella y que ficiere, nesti casu, unos arreglos muncho más rompedores. Qu’esti discu fuere una ruptura colo anterior. Creo que ta más que consiguío. Amás, ye una persona cola que nos entendemos perbién, que conectamos ensiguida los gustos que tenemos, les coses que nos atraen… Entamamos a trabayar y equí ta’l resultáu.
«Cuando volvimos xuntanos, yá veníemos trabayando con Ruth Suárez, pero volvimos a retomar en serio la idega y que ficiere, nesti casu, unos arreglos muncho más rompedores. Qu’esti discu fuere una ruptura colo anterior»
En rellación a esto mesmo, ún de los puntos fuertes de la grabación ye, xustamente, el trabayu vocal, non solo a nivel de testura, sinón tamién de calidá. ¿Cómo foi’l trabayu individual y colectivu nesti sen?
Nesti casu, como tenemos cada vez más años, más se va complicando lo personal y menos tiempu queda pa lo colectivo. La forma de trabayu foi asina: Ruth mandábanos les guíes de trabayu a caúna -individuales coles nuestres voces- y, cuando les teníemos, facíemos un ensayu o dos colectivos enantes de la grabación. Por eso agora la presentación en directo va ser en marzu, fáltanos esi trabayu colectivu pa poder echalo a andar.
¿Cuál ye’l cantar col que vos sentís más identificaes?
Creo que’l cantar del discu que más nos impactó a toes no emocional foi ‘Lluna de flores’ porque sentísmoslu mui emocionante. De fechu, la primer vez que lu sentí yo, dempués de tar grabáu y masterizáu, lloré. Ye un tema que nos emociona especialmente.
«El cantar del discu que más nos impactó a toes no emocional foi ‘Lluna de flores’»
¿Y el mayor retu que topastis nel procesu d’ensayos y grabación?
El meyor retu foi, efectivamente, poder xuntanos pa ensayar. Pero dalgo de lo que pienso que nos sentimos arguyoses abondo, como comentaba enantes, ye’l deprendizaxe no personal, que tamién apaez reflexao na primer fueya del llibretu. Esti tiempu de silenciu tamién foi un tiempu de crecimientu, y yo creo que coincidimos toes nun momentu de medrar nel amor propiu. Suplimos esa falta de tiempu colectivu con ello y foi de muncha valía pa enfrentanos a la grabación.
«Hasta 2003, más menos, siempre que víemos pandereteres n’Asturies, víemosles col traxe tradicional o tocando en grupos de baille. Nosotres, con ventipocos años, viendo otros referentes como Mercedes Peón, Faltriqueira o Leilía en Galicia, muyeres poderoses con ganes de llevar la música tradicional a otros sitios, diximos: esto ye lo que tenemos que facer»
Fuistis pioneres na Pandereta Revolution con ¡Sali, L.luna! nel 2007, un discu qu’amiesta dellos xéneros y, ente ellos, la electrónica a la que tornáis con esti nuevu CD. Sicasí, en 2013 volvistis al raigañu con N’acústicu, ¿por qué?
Cuando entamamos a tocar nel 2003, teníemos claro que lo que queríemos facer yera dar una vuelta al conceptu de panderetera. Hasta esi momentu, más menos, siempre que víemos pandereteres n’Asturies, víemosles col traxe tradicional, tocando la pandereta en grupos de baille… Naquel momentu yera referente’l grupu de Muyeres, pero facíen espectáculos onde diben vistíes col traxe tamién, y lo qu’elles pretendíen yera ser lo más fieles posible a la tradición. Nosotres, con ventipocos años, viendo otros referentes que yá taben apaeciendo n’otros territorios como Mercedes Peón, Faltriqueira o Leilía en Galicia, muyeres poderoses con otra percepción de la música, con ganes de llevar la música tradicional a otros sitios, pues diximos: esto ye lo que tenemos que facer.
Entós, a partir de 2003, entamamos a ensayar y currar bastante, y dende’l 2005 empezamos a tocar con una banda de músicos y nesos dos años fuimos creando’l repertoriu de lo que dempués foi’l discu de ¡Sali, L.luna! con música funk, rock, electrónica, jazz… Foi una explosión total de too, queríemos probalo too y too yera poco. Dempués d’esi tiempu fuimos medrando no personal, reflexonando sobre lo que queríemos, la importancia de les nuestres voces, poder facer xuegos vocales… medrar un poco nel grupu lo que yéremos nosotres, les compañeres. D’ehí salió N’Acústicu, dalgo más personal, más íntimo, dando importancia a les nuestres voces, les panderetes, los panderos, la música tradicional en sigo mesma. Acompañaes d’unos músicos d’un nivel que nos emocionaba tocar con ellos cada vez que lo facíemos.
Pa esti últimu discu tamos viviendo un momentu de muncha presencia de la música electrónica, de muncha xente que xuega cola música tradicional y la electrónica, y paecíanos dalgo prestoso y no que nos apetecía metenos agora. Asina salió esti discazu.
¿Cómo valoráis la revolución de la pandereta nesta última década nel país y n’otros territorios?
Había muncha xente faciendo música tradicional dende va munchu tiempu, y muncha xente xugando con ella pa facer otres coses con otros soníos. Pa min, lo que pasó col fenómenu Tanxugueiras -que nosotres yá les viéramos en Xixón col discu anterior y yeren bonísimes, unes pandereteres escelentes con un discu perbonu-, ye que llegaron a los medios de comunicación, a los mass media y al prime time de la televisión, a un momentu clave de la pantalla, vistes por millones de persones. Llegaron ehí y foi una suerte pola reivindicación, amás, qu’elles facíen nel cantar que sacaron col “nun hai fronteres” a los países piquiñinos del Estáu, les llingües minorizaes, la música tradicional… la identidá propia, a la fin. Una vuelta a los raigaños y a la necesidá de pertenencia.
Agradecíes de qu’esti fenómenu asocediera. Gracies. Al mesmu tiempu taba xente como Rodrigo Cuevas tamién con un discursu mui claru sobre la pertenencia, el territoriu, cómo nos rellacionamos, en qué mundu queremos vivir. Hai referentes importantes nel mundu de la música que tán volviendo a ponenos nel sitiu que merecemos.
«Tanxugueiras llegaron a los medios de comunicación, a un momentu clave de la pantalla, vistes por millones de persones. Llegaron ehí y foi una suerte pola reivindicación que facíen a una vuelta a los raigaños y a la necesidá de pertenencia»
¿En qué coses veis que cambió la industria nestos años? ¿Cómo tuvistis qu’actualizavos p’adautavos a la industria d’anguaño?
El cómo cambió la industria, pa min, ye un reflexu de cómo cambió la sociedá, la forma de consumir na que nos movemos nesti sistema capitalista que nos bombardea permanentemente. El mayor llogru d’Herbamora, y qu’espero que seya’l que nos mantenga, ye la vivencialidá. Creo qu’una parte importante de qu’Herbamora saque un discu agora y de que volvamos a tar n’activo otra vez, que volvamos a esponenos públicamente, ye la necesidá d’espacios onde poder compartir la vida, onde poder cantar y baillar la nuestra música. Nesti tiempu nel qu’aparentemente nun hebo nada, sí que fuimos a nueches en danza, espacios colectivos onde poder compartir la vida y la música. Eso ye lo que nos fai grandes como pueblu y lo que nos pierde per dientro a nosotres pa poder tocar xuntes. Yo munches veces digo a les compañeres, tocando con elles, que s’acaba’l mundu nesi momentu, nun necesito más: tocar, baillar y vibrar al mesmu son.
La industria musical que cuerra pa onde quiera, que nosotres vamos siguir colos pies na tierra. Si se nos siente per redes, maraviya; si llega a cuanta más xente, meyor; pero si podemos venos, tocar, baillar y cantar xuntes, muncho meyor.
«Una parte importante de qu’Herbamora saque un discu agora y de que volvamos a tar n’activo otra vez ye la necesidá d’espacios onde poder compartir la vida, onde poder cantar y baillar la nuestra música»
Pa esti trabayu arrodiastisvos d’un equipu de muyeres, ¿qué importancia tien pa vosotres? ¿Qué valoración faes de la industria musical asturiana nesti sen? ¿Ónde ves qu’hai mayor falta d’un cambéu de perspectiva?
Que nesti discu nos acompañen muyeres nun ye casual, claro que non, porque sentimos que necesitamos visibilizanos; buscar referentes, porque les necesitamos, y hai munches muyeres que son referentes o que pueden selo. Trabayar con Leti, con Cris, con Ruth, que son persones coles que compartimos les emociones de los que sentíemos nel momentu que tábemos creando, cómo elles pudieron recibiles y tresformales no que nosotres queríemos y necesitábemos… Eso ye una suerte tan grande; sentir que cuanto más medramos ente nosotres, más humanizaes nos sentimos y más arguyoses del trabayu que facemos.
Yo creo que falta, en xeneral, que les muyeres se visibilicen. Cuesta muncho esponenos públicamente y ye un esfuerciu grande. Cada cosa que decimos, pensámosla muncho, intentamos que seya lo más políticamente correcta, tener los datos más fiables, la información más veraz, más ellaborada, más estrucutrada… Esponenos públicamente ye duro, pero necesitámoslo, porque si non, nun tamos nos espacios. Tócanos atrevenos y arrodianos de xente que nos faga sentir casa.
«Que nesti discu nos acompañen muyeres nun ye casual porque sentimos que necesitamos visibilizanos y buscar referentes. Trabayar con Leti, Cris y Ruth ye una suerte mui grande, sentir que cuanto más medramos ente nosotres, más humanizaes nos sentimos y más arguyoses del trabayu que facemos»
Volviendo a esti discu, ¿cómo y cuándo vamos poder ver 286 llunes enriba l’escenariu?
286 llunes va presentase, si va too bien y los astros nos acompañen, el 22 de marzu en La Benéfica a les 7 la tarde.
«286 llunes va presentase el 22 de marzu en La Benéfica pela tarde»
Yá pa finar, ¿qué otros planes futuros tenéis como grupu?
Pues ta difícil, porque, como dicía enantes, caúna no personal trabayamos en diferentes profesiones y, amás, conciliamos vida familiar, criatures que cuidar, etc. Quédanos pocu tiempu pa Herbamora, asina que nun sabemos qué va pasar l’añu qu’entra. A ver cómo xestionamos. Oi, si va mui bien la cosa, igual dexamos los nuestros trabayos y dedicámonos al grupu… Non, nun lo sé.
Suscríbite a les nuestres novedaes
