Rodrigo Cuevas, Dixebra, Llevólu’l Sumiciu y Ferla Megía. Cuatro de les propuestes con más sonadía de la música asturiana van coincidir esti sábadu 28 d’avientu enriba d’estremaos escenarios d’Uviéu. Per un llau Rodrigo Cuevas lleva’l so espectáculu La Romería al Teatru Campoamor el vienres 27 y sábadu 28, con toles entraes escosaes dende va tiempu. El míticu grupu de rock astur Dixebra va dar el so tradicional conciertu navidiegu -pensáu sobre manera pa la xente emigrao que torna estos díes a casa- na sala Tribeca a les 19.30h. Per último, dos de les propuestes más nueves de la música’l país, Llevólu’l Sumiciu y Ferla Megía, van presentar a les 21h na sala La Salvaje los sos trabayos nuevos. Tolos conciertos surden de la iniciativa privada, que ye la que ta puxando por programar música n’asturianu na capital del país.
Dempués de les polémiques coles «jackers turques« y los deseos de censura per parte l’Ayuntamientu d’Uviéu, Rodrigo Cuevas va actuar enllenando’l teatru principal de la ciudá que lu vio nacer. El vienres 27 y sábadu 28 toles butaques del Campoamor van tar ocupaes pa ver l’espectáculu qu’acompaña al discu Manual de Romería (Sony Music Spain, 2023), trabayu que supunxo la consolidación definitiva d’esti axitador folclóricu. Con estes cites, Cuevas escosa toles entraes del tercer de los grandes espacios escénicos del país, tres vender too en poco tiempu pa los sos conciertos nel Teatru de La Llaboral y del Centru Niemeyer d’Avilés.
El sábadu 28 d’avientu, con apertura de puertes a partir de les 19:30 hores, la sala Tribeca Live d’Uviéu va acoyer el tradicional conciertu de zarru de temporada de la banda Dixebra. Los avilesinos siguen presentando en directo l’ultimu trabayu que publicaron, el discu-llibru tituláu Ente la niebla, una obra multidisciplinar que tresciende l’aspectu musical pa convertise nun exerciciu de memoria colectiva alredor de la historia de les clases populares asturianes. Les entraes anticipaes yá tán a la venta al traviés d’Entradium con un preciu de 13 € y na puerta a 16 €. Ye yá una tradición que Dixebra se realcuentre neses feches con munchos y munches siguidores espatriaos que vuelven a casa y recarguen piles cola potencia de la banda en vivo.
Ferla Megía y Llevólu’l Sumiciu son dos de los nomes más orixinales y mozos de la música asturiana d’anguaño. Los dos proyectos asoleyaron el pasáu payares los sos primeros trabayos –Páxaros 01 y La Llobera– y van presentalos en directo con un doble conciertu a les 21h. na sala La Salvaje d’Uviéu. Les entraes pa esta nueche d’electrónica, dembow, reggaeton, folk, trap y pop puen mercase n’Entradium con un preciu de 10,55 €. El conciertu entámalo Lacre, l’axencia nueva que ta xestionando conxuntamente la contratación d’estes propuestes renovadores.
Suscríbite a les nuestres novedaes
