La Conseyería de Cultura, Política Llingüística y Deporte abrió l’espediente pa declarar Bien d’Interés Cultural (BIC) de calter inmaterial la xota n’Asturies. La resolución, publicada nel BOPA, abre’l camín pa reconocer y protexer esta espresión de la cultura tradicional, na que s’atopen la música, el baille, les llingües propies y la memoria xeneracional. Pue consultase’l documentu calcando nesti enllaz.
La xota sigue formando parte de la vida de munchos pueblos. Ta presente en fiestes, romeríes y alcuentros populares, y llegó hasta los nuestros díes gracies a los que la baillen, cántenla y tresmítenla. La so protección cobra especial importancia yá qu’España tramitó la so candidatura integrar la Llista Representativa del Patrimoniu Cultural Inmaterial de la Humanidá de la Unesco, que va ser esaminada n’avientu del 2026.
La memoria técnica qu’acompaña la resolución destaca la riqueza llingüística de la xota n’Asturies. Les sos lletres recueyen espresiones n’asturianu, eonaviego y castellán, y reflexen la diversidá cultural de los territorios nos qu’esta tradición echó raíces.
La protección de la xota contribúi tamién a reconocer el patrimoniu llingüísticu qu’integra esta tradición. Los cantares, los pasos y les melodíes conformen un mesmu heriedu que se tresmitió ente xeneraciones y que sigue viva. Reconocer el so valor ye una forma de caltener la identidá y de favorecer que la mocedá pueda conocela y facela suya.
La xota báillase en prácticamente toa Asturies, anque non de la mesma manera. L’espediente identifica a lo menos seis grandes variantes xeográfiques, con diferencies nos pasos, les melodíes y los acompañamientos, y recueye referencies documentaes de la so presencia en Llanes a empiezos del sieglu XIX. Detrás del so caltenimientu ta’l trabayu de los grupos de baille, les escueles de música tradicional y munches persones que caltuvieron vivos los repertorios. A esi llabor sumáronse iniciatives como les nueches en danza, que devuelven el protagonismu a los que s’axunten pa baillar y compartir la tradición, más allá de los escenarios.
La xota foi reconocida nel 2023 como Manifestación Representativa del Patrimoniu Cultural Inmaterial pol Ministeriu de Cultura y incorporóse al Censu del Patrimoniu Cultural Inmaterial d’Asturies en xineru del 2024. En mayu d’esi añu, el Conseyu del Patrimoniu Cultural d’Asturies informó favorablemente del entamu del espediente pa la so declaración como BIC.
Suscríbite a les nuestres novedaes
