El Festival Internacional de la Mázcara Ibérica (FIMI) ye ún de los festivales más importantes del mundu dedicáu a la tradición de les mazcaraes y, por vez primera, va facese fuera de Portugal, el país onde nació. La Conseyería de Cultura, Política Llingüística y Deporte anuncia que va financiar la XVIII edición d’esti certame pa que se celebre «con un ampliu programa d’actividaes especialmente nos conceyos onde pervive la tradición de les mazcaraes» y l’oxetivu de «reforzar la protección y l’espardimientu del patrimoniu cultural inmaterial», concidiendo col procesu abiertu pa declarar como Bien d’Interés Cultural (BIC), de calter inmaterial, al conxuntu de mazcaraes d’Asturies.
Dende’l gobiernu asturianu avancen que la programación va ser «amplia y inclusiva» y pon en valor «los llazos comunes y la diversidá cultural europea«. Asina ye como va haber conciertos y actuaciones en directo con «ritmos tradicionales y propuestes contemporánees«; proyecciones audiovisuales y esposiciones de fotografía «dedicaes a la historia y al arte de les mázcares ibériques, con obres d’artistes locales y internacionales que dialoguen ente la tradición y la creación contemporánea»; conferencies y meses d’alderique «cola participación d’especialistes de Portugal, España y otros países europeos» y talleres y demostraciones al cargu d’artesanos de mázcares y traxes «que van compartir técniques tresmitíes de xeneración en xeneración y van ufiertar al públicu la posibilidá d’interactuar y conocer estos procesos creativos».
«El momentu cume del festival va ser el gran desfile de la tarde del 13 de xunu n’Uviéu, cola participación de grupos de la Península Ibérica y d’otros países europeos. Va ser una procesión colorida que va percorrer les cais de la capital y qu’axuntará al rodiu de 600 participantes, representantes de la mayoría de les identidaes ibériques nes que los rituales de la mázcara siguen vivos», afirmen dende Cultura.
El Festival Internacional de la Mázcara Ibérica nació en 2006, cuando un desfile na ciudá d’Oporto marcó l’arranque d’esta iniciativa. Nos años siguientes, el FIMI consolidóse en Lisboa con quince ediciones consecutives, hasta convertise nún de los eventos culturales más relevantes de la Península Ibérica y atraer a miles de visitantes y participantes de dellos países.
Nos distintos años dende la creación del FIMI foron munchos los grupos asturianos que participaron activamente na so programación, apurriendo’l so trabayu y el so compromisu a un proyectu cultural compartíu. Colectivos como los Mazcaritos d’Uviéu, Os Reises de Tormaleo, Os Reises de Valledor o los Sidros, ente otros, viaxaron a Portugal pa formar parte del festival, amosando la riqueza de les mazcaraes del país y contribuyendo a estrechar unos llazos que se consolidaron colos años.
«Que’l festival se celebre agora n’Asturies ye un pasu coherente con esi percorríu y tamién una reconocencia a la implicación constante del texíu cultural asturianu. L’apueste del gobiernu d’Asturies, en collaboración cola organización del propiu festival, el Conceyu d’Uviéu y diverses entidaes culturales y académiques d’Asturies y Portugal, sofita’l llabor de los colectivos asturianos y refuerza’l compromisu institucional cola protección y la tresmisión d’un patrimoniu cultural inmaterial que pervive dende los nuesos antepasaos y forma parte esencial de la identidá colectiva asturiana», conclúi la nota prensa de la Conseyería de Cultura.
Suscríbite a les nuestres novedaes
