Hai un añu la Conseyera de Cultura, Política Llingüística y Deporte, Vanessa Gutiérrez, participó nos actos del Día Internacional de la Gaita entamaos pol Conceyu de la Gaita y, nellos, anunció que’l gobiernu asturianu diba entamar los trámites pa declarar Bien d’Interés Cultural (BIC) la cultura asturiana de la gaita. Esti domingu pasáu Gutiérrez volvió a participar na xornada entamada por esta asociación en Noreña y declaró que yá tienen «los estudios pertinentes pa llevalos al siguiente plenu de la Comisión de Patrimoniu«, que previsiblemente va ser «enantes del branu«. Asina qu’hai avances na cuestión.
Ún de los estudios colos que se trabaya pa la declaración BIC ye la Memoria de la gaita asturiana, que recueye la vitalidá que tien esti instrumentu dientro de la cultura asturiana: na actualidá hai unos 3.000 gaiteros y gaiteres n’Asturies; hai 96 agrupaciones de gaita -de les que trece tán n’otres comunidaes autónomes del Estáu español y diez son internacionales; hai cinco lutiers y s’estima qu’esti sector xenera unos cuatro millones d’euros.
El musicólogu, gaiteru y miembru del Conceyu de la Gaita, Luis Álvarez Pola, ye autor de la memoria que defende les razones pa declarar BIC a la gaita. «Bien comprendida y desarrollada d’una manera transversal puede impulsar la cultura de la gaita a niveles que tovía güei nun conoz«, declaró a RTPA Álvarez Pola reclamando tamién «un censu de gaites vieyes» y que’l BIC traiga l’impulsu al estudiu y la divulgación de «saberes, conocimientos y tradiciones venceyaes al instrumentu».
«El Conceyu de la Gaita ta faciendo un trabayu mui importante afondando na investigación de la nuestra cultura«, destacó Vanessa Gutiérrez nel actu del Día Internacional de la Gaita sorrayando’l «papel que tuvo la emigración na preservación y la difusión de la cultura asturiana de la gaita«. La conseyera agradeció que dende’l Conceyu de la Gaita se «celebre, reivindique o analice’l llegáu» d’esta emigración, «amás de poner poner en valor el trabayu de diferentes persones» y punxo como exemplu «constructures» o «les muyeres, que na tradición a vegaes tán invisibilizaes».
Precisamente, na xornada d’esti domingu pasáu qu’entamó’l Conceyu de la Gaita tuvo protagonizada por estes cuestiones cola conferencia La gaita asturiana en Bélxica al cargu d’Esteban Méndez; la charra Vivencies d’una gaitera asturiana de Belén Arboleya y l’homenaxe al gaiteru de La Campa (Llangréu) Maximino García Costillas.
Suscríbite a les nuestres novedaes
