Del Bronx a Bimenes, un percorríu pel rap n’asturianu

El 11 d’agostu foi’l 50 aniversariu del nacimientu del hiphop en Nueva York y anque les esperiencies de rap n’asturianu son escases, esti estilu lleva 26 años sonando na nuestra llingua.

Va 50 años que’l barriu neoyorquín del Bronx acoyó’l nacimientu del hiphop, ún de los movimientos culturales más influyentes de finales del sieglu XX y d’esti XXI. La cai foi l’escenariu; les comunidaes afroamericanes y latinoamericanes les protagonistes; y los block parties les folixes qu’aglutinaron y dinamizaron les cuatro espresiones que formen esta cultura urbana: rap -forma de cantar o recitar que da nome al xéneru musical-, DJing o turntablism -reproducir y crear pistes de música nuna mesa de mezcles-, breakdance -el baille-, y graffitti -la pintura con aerosoles n’espacios urbanos-. Esti movimientu evolucionó, amestóse con otros sones -d’él fueron naciendo estilos como’l reggaeton, rap-metal o trap-, y trescendió milenta llendes, convirtiéndose nún de los fenómenos musicales más populares y globales del nuestru tiempu. Espardióse tanto qu’hasta se fizo rap n’asturianu en Bimenes; pero’l camín d’esti xéneru fechu na llingua’l país ye tovía mui pequeñu y inestable.

Según dalgunes fontes, el nacimientu del hiphop foi’l 11 d’agostu de 1973 nel Bronx. Esta fecha ye discutida, pero lo que sí que ta claro ye cuándo nació’l rap n’asturianu: 1997. L’entamu marcólu la publicación del cantar “Si España qu’españe” d’Anarquía Positiva dientro del discu L’Asturianu Muévese, históricu compilatoriu publicáu por Discos L’Aguañaz a iniciativa del so responsable, Xune Elipe, nel que quince perconocíes bandes vasques, gallegues, catalanes, castellanes y aragoneses grabaron una versión n’asturianu d’ún de los sos temes y cinco bandes asturianes aportaben un cantar d’aquella inéditu. L’avilesín Dani Stylo, “patriarca” del hiphop n’Asturies, yera’l cantante d’Anarquía Positiva, grupu rap-metal surdíu nos 90 que yera de los pocos qu’había d’esti estilu per tol Estáu español. El compromisu llingüísticu y col hiphop d’esti músicu ye constante a lo llargo de los últimos 25 años y la so voz ta presente n’esperiencies de rap n’asturianu como’l cantar “Un Pasu Alantre” (2006) del colectivu Músicos Pola Oficialidá; los dos discos de Soncai System; les versiones de Dixebra -“Grieska” y, xunto a Arma X, “Kuenka Chunga”- que fizo pal compilatoriu Salú ya Dixebra (2007); la so participación nel grupu de hiphop dafechu n’asturianu K-Nalón; o la collaboración nel cantar “Asturies Streets III” (2017) del raperu xixonés Doris Escarlata.

Cuenca Maphia

Güei pue sentise rap que naz en contestos rurales, pero per muncho tiempu esti movimientu desenolvióse namás n’entornos urbanos. N’Asturies, son tres los principales focos d’esti xéneru, qu’amás son les zones más industriales: Avilés, Xixón y les Cuenques. Ye nesti últimu territoriu onde nació y existió a primeros de la década de los 2000 Cuenca Maphia, nome baxo’l que s’alcontraben distintos protagonistes de la escena hiphop asturiana. Dientro d’ellos hai dos nomes que destaquen sobre manera: Stoned Atmosphere (y Arma X) y K-Nalón. El primeru foi probablemente’l grupu más trescendente del rap asturianu, qu’en namás 3 años que tuvieron n’activo grabaron cuatro trabayos consideraos “de cultu” pa tolos siguidores d’esta música n’Asturies, sobre too pa la mocedá que vivía nes cuenques d’aquella y que se sintieron bien identificaos cola realidá que’l MC Arma X rapeaba sobre les bases del DJ Ceeris. Nel discu Issue 3 (2004) grabaron dos temes con fragmentos n’asturianu: “5” y “Patria Sin Sol” nel que collaboraron Tori y Delfo de K-Nalón. Precisamente K-Nalón foi per muncho tiempu l’únicu grupu qu’existió de rap dafechu n’asturianu. Los sos comienzos remóntense al conceyu de San Martín del Rei Aurelio nel 2003 y en 2006 publicaron Conciencia Llibre, maqueta qu’hasta esti 2022 foi l’únicu discu completu de rap qu’asoleyó na nuestra llingua. Va más d’una década’l yá mentáu Dani Stylo incorporóse a esta formación caracterizada poles sos lletres combatives y el so compromisu políticu, daqué que los llevó a afuxir de los estereotipos del rap más comercial, a actuar n’abondos conciertos solidarios y a asoleyar dalgún cantar nuevu de xemes en cuando. Sicasí, yá va dellos años que nun xuben a un escenariu.

Per otru llau, tres la separación de Stoned Atmosphere, Arma X siguió una trayectoria en solitario qu’aporta hasta los nuestros díes. Tien rapeao n’asturianu davezu xunto a Soncai System, nel compilatoriu Bestiariu 3 (La Fabriquina, 2017) col cantar “Nun ye País pa Gatos”; o collaborando nesti 2022 nel corte “Sigui’l camín” de Mostru l’Horru. Nesti últimu tema tamién andecha la rapera llangreana Guaja D, ún de los nomes más destacaos del actual rap fechu n’Asturies y que tien un tema grabáu n’asturianu, “Se esnalar”, dientro del compilatoriu El Mio Cantar qu’editó la Conseyería de Cultura en 2019. Güei Cuenca Maphia nun existe, pero sigue faciéndose hiphop nes cuenques. El castellanu ye la llingua qu’usaron la mayoría d’estos grupos pa espresase, anque tamién hebo bien de cantares n’amestáu, reflexando asina la realidá llingüística de les cuences. Proyectos yá finaos como Testimoniu la Víztima -que tienen tamién temes dafechu n’asturianu- o 13 Palabras son dalgunos exemplos xunto a otros nones anguaño n’activo como Machodeferia.

Rap made in Tutu Estudios

Poder sentir rap n’asturianu ye daqué qu’hai qu’agradecer tamién a Sergio Rodríguez, responsable de los Tutu Estudios de Corvera. De les sos composiciones nacieron les bases musicales de los cantares del colectivu Músicos Pola Oficialidá. Baxo esti nome asoleyaron diez temes qu’ente 2005 y 2021 fixeron por poner banda sonora a la reivindicación llingüística, faciéndolo amás con soníos novedosos dientro de la música n’asturianu. Rap, reggae, funk o soul sonaron nestos cantares so los que rapearon los yá mentaos Delfín Valdés y Dani Stylo, Vito Álvarez y Aique de los desapaecíos Chalaneru Sound System, Galán, Miguel Fernandi de Skama la Rede o Xune de Dixebra. 

Y la cosa nun quedó ehí. El tándem formáu Sergio Rodríguez y Xune Elipe creó Soncai System, un proyectu de música mestiza nos que’l rap tuvo abondo protagonismu xunto a otros sones como’l reggae, rock o incluso jazz. Los discos Clashturies (2007) y Revoluson (2012) recueyen temes que rapeen na llingua llariega y nos que collaboraron DJ Pimp -ganador de dellos campeonatos de turnablism del Estáu español- y otros MC como’l pernomáu Dark la eMe, Navarro, Ruboh d’Unomasuno -otra de les formaciones más populares de la historia del rap d’Asturies- o l’astur-colombianu Shalom, que tamién tien rapeao con Dixebra y Músicos pola Oficialidá.

Mostru l’Horru y Bimenes Underprau

Al contrario de lo que pasó n’otros xéneros “importaos” como’l rock o’l folk celta, n’estos 25 años d’historia que tien el rap n’asturianu nun se construyó una escena estable, continua y con una trescendencia bultable ente’l públicu. Como fuimos mentando, sacantes el casu de K-Nalón, la mayoría de les esperiencies fueron collaboraciones puntuales, frases n’asturianu en dalgún cantar -como les del xixonés Doris Escarlata o’l raperu de Samartín Machodeferia-, o participación de MCs en proyectos colectivos. Amás cuasi siempre los protagonistes foron los mesmos, lo que contrasta con una escena de hiphop fecha n’Asturies que tien a nomes actuales tan destacaos como Gazir -raperu de Muros del Nalón que con namás 21 años ye campeón internacional en delles competiciones de freestyle y al que siguen cuasi 500.000 persones n’Instagram- o’l xixonés Enol, que tien más de 250.000 oyentes mensuales en Spotify. Tamién contrasta cola escena de música urbana gallega, vasca o catalana, con abondes formaciones que rapeen nes sos llingües autóctones. Hai dalgunes razones que despliquen esta anomalía, como la poca mocedá qu’hai n’Asturies, o la falta d’alfabetización n’asturianu y d’una política llingüística atractiva ente la xente más mozo. Sicasí, esti 2022 hai dalgunes razones pal optimismu.

«Hai dalgunes razones que despliquen la debilidá del rap n’asturianu , como la poca mocedá qu’hai n’Asturies, o la falta d’alfabetización n’asturianu y d’una política llingüística atractiva ente la xente más mozo»

N’abril asoleyó Fesoria y Garabatu, la sesta referencia de Bimenes UnderPrau, proyectu formáu en 2018 en Bimenes pol astur-madrilanu Pablo M. Testa pa esperimentar cola música electrónica y la narrativa sonora. Tres adentrase nel hiphop en 2021 cola maqueta Pelo Segao, con esti trabayu nuevu axunta electrónica, hiphop y lletres n’asturianu de calter políticu y reivindicativu a lo llargo de diez temes nos que la esperimentación sonora ta bien presente, abriendo asina un camín distintu dientro de la escena del rap n’asturianu.

El MC xixonés Fran Méndez y el productor llangreanu Zeros formen Mostru l’Horru, dúu que se presentó esti 2022 ente’l públicu con abonda sonadía, por mor de que’l so tema “Fíu d’un pueblu” foi nomináu al Premiu Camaretá al Meyor Cantar. Tres d’asoleyar dellos singles y videoclips a lo llargu l’añu, a finales de setiembre publicaron Señales de Fumu, el so primer llarga duración. El trabayu supón el regresu d’esi rap n’asturianu comprometíu que representaben formaciones como K-Nalón, pero actualizándolo al tiempu nuestru y a los gustos musicales del dúu. D’esta manera, nel álbum suenen influencies d’otros estilos como’l reggae o’l rock; voces rapeaes y tamién melódiques; les collaboraciones d’Arma X, Guaja D y el guitarrista folk Nel de Purnea; y unes lletres con abonda riqueza llingüística centraes en temátiques polítiques y personales.

«El rap n’asturianu lleva resistiendo 25 años pesie a toles dificultaes y va abriendo un camín pel que ye necesariu que se sumen nueves voces que faigan rap, trap, dembow o reggaeton, pa que l’idioma conecte colos gustos musicales de la mocedá d’esti tiempu»

Como curiosidá, tanto’l cabezaleru de Bimenes UnderPrau como’l de Mostru l’Horru, tán emigraos anguaño en Barcelona; una amuesa de la emigración xuvenil que sufre Asturies y de cómo esto afecta a la estabilidá de la escena y al so públicu, que se ve amenorgáu. Sicasí, el rap n’asturianu lleva resistiendo 25 años pesie a toles dificultaes y pasín a pasu va abriendo un camín pel que ye necesariu que se sumen nueves voces que faigan n’asturianu rap, trap, dembow o reggaeton, pa que l’idioma conecte colos gustos musicales de la mocedá d’esti tiempu, como asina lo fizo’l canciu astur cola mocedá de los años 70, el folk cola de los 80, o’l rock cola de los 90.

Xicu Ariza. Artículu publicáu orixinalmente nel Anuariu de la Música Asturiana 2022.