“Viva San Roque y el perru” ye’l single nuevu del intérprete de tonada Odón del Paganéu

Güei 16 d’agostu ye San Roque y Odón del Paganéu va tar nel Campu San Roque, en Tinéu, faciendo la misa asturiana de gaita cantada en latín. Coincidiendo con esta celebración, el cantador de tonada llanza en toles plataformes dixitales “Viva San Roque y el perro“, el so single nuevu. Como comenta l’artista, «el cantar ta fechu ad hoc pa la entrada y salida d’esta misa solemne de San Roque» y nél ta acompañáu por Pepín de Muñalén a la gaita, yá que dambos intérpretes tienen venceyu directu y familiar con conceyu de Tinéu.

Esta pieza ye’l segundu adelantu de Tonaes ad hoc, el próximu discu qu’Odón del Paganéu va publicar y que ta grabando nos estudios La Nozal baxo los mandos de Fernando Malva. D’esti trabayu va dir del llanzando pasín a pasu singles en formatu dixital. “Larga y complicada” foi’l primeru qu’asoleyó’l pasáu mes de xunu coincidiendo con San Xuan y agora llega’l momentu d’esti “Viva San Roque y el perru”.