«Filanda nunca desapaez del too y tenemos dalguna idea nueva pal futuru»

Va unes selmanes Filanda asoleyaron a traviés de YouTube un videu interpretando un cantar nuevu n’asturianu, «Quédate«. Esta publicación supunxo una novedá dientro de l’actividá d’esti dúu que llevaba 4 años ensin llanzar material nuevo porque, como comenta Ángela Gómez de Ávila, una de les sos vocalistes y guitarristes, «Filanda ye como’l Guadiana, apaez y desapaez, pero nunca desapaez del too». «Dende qu’Ana marchó pa Francia y nos separtamos siempre que vuelve facemos dalguna cosina; entós tamos nun dexando morrer Filanda, que ye lo que más nos presta». Amás, la vocalista anuncia que tienen «dalguna idea nueva pal futuru».

Les avilesines Ana Pereda y Ángela Gómez formaron va una década Filanda como un dúu acústicu qu’entemez pop, folk, rock y otros estilos. El so videu «Enraigonaes» -que tien la collaboración de Toya Solís al vigulín-, foi la so carta de presentación. En 2015 asoleyaron el so primer y únicu discu, Despeinando’l Silenciu, qu’incluyía nueve temes tanto n’asturianu como en castellanu, con una sonoridá diversa y el pop-rock como puntu d’alcuentru y unes lletres poétiques nes que’l compromisu social ta bien presente.

La emigración de les sos componentes causó que se tuvieran que separtar y que llegaren al puntu nel que tán agora, d’actuar namás esporádicamente o sacar material de xemes en cuanto. Sicasí, como diz Gómez de Ávila, nun tán inactives. «Ana en Francia ta tocando y ye compositora nun grupu que se llama La Guinda -qu’incluso tien un tema n’asturianu, «Alcordanza«-; y yo ente l’añu pasáu y esti tamién tuvi componiendo nuevos cantares», desplica l’artista.

Quédate

Ún d’esos cantares nuevos que compuxo Ángela Gómez ye esti «Quédate» del que fala asina: «Ta dedicada a una bona amiga de mio ma y grabámosla colos pocos recursos que teníemos; que yeren un móvil y ganes. Ficímoslo cuando Ana vino p’Asturies unos díes, fuimos pasar la nueche al llau del mar y aprovechamos esi momentu tan guapo pa cantar». El videu ta grabáu na playa d’Oleiros por Elena Jorrin y ye una muesa d’esti momentu nel que ta anguaño Filanda: «faciendo lo que podemos cada vez que podemos, nun dexando morrer el grupu y con dalguna idea nueva pal futuru».