Ente la tarde del xueves y el sábadu, los conceyos de Xixón, Uviéu, Llanera, Sariegu, Bimenes, Grau y Cangas del Narcea van ser l’escenariu d’ocho eventos nos que va poder sentise música sinfónica, folk, asturianada, canción d’autora, pop y música tradicional. Héctor Braga abre l’axenda cola presentación del so llibru Nel cantu la memoria. Ensayu sobre l’asturianada tradicional dientro del ciclu Autores nel Camín na Casa la Cultura de Sariegu güei a les 19h. Nesi momentu, José Manuel Tejedor, Dani Álvarez y Richard García van tar tocando nel CMI Atenéu de La Calzada, en Xixón.
La programación del vienres entama a les 12h na Sala de Cámara del Conservatoriu Superior de Música ‘Eduardo Martínez Torner’ n’Uviéu, onde Elba Rodal Graña va presentar la so investigación sobre la orquestación de parte del discu Lo Fugaz de Marisa Valle Roso. Nel actu va participar tamién la cantante y compositora, interpretando los arreglos xunto a un tríu de cámara formáu por Carlota Carrera, Daniel Iglesias y Sofía Soto. Pela tarde, dende les 20h, Vero Rubio zarra la XXIII Selmana Cultural de Cangas del Narcea con un conciertu nel Teatru Toreno nel que va tar acompañada d’un tríu de cuerda, Puri Penín y Pepín de Muñalén. A les 22.30h, Deira toquen nel chigre folk uvieín L’Esperteyu.
El sábadu, l’A.C. La Madreña celebra’l so 50 aniversariu con una actuación especial na Plaza La Habana de Posada de Llanera a les 19h. De siguío, La Bontuné actúen en Grau dientro del ciclu Autores nel Camín por tener ganao el Premiu Camaretá na so cabera edición. El conciertu va ser na Capiella los Dolores a les 19.30h. Zarren la programación Deira na Casa la Cultura de Bimenes a les 20h.
Tola programación d’equí a los próximos meses pue vese na Axenda de Musicasturiana.com.
Suscríbite a les nuestres novedaes
