Elba Rodal Graña, clarinetista, directora y alumna del Conservatoriu Superior de Música ‘Eduardo Martínez Torner’, presenta mañana una esbilla del Trabayu Fin d’Estudios que va defender en xunu: Una visión sinfónica de Marisa Valle Roso: presente y futuro de la música asturiana. La charra-conciertu va ser na Sala de Cámara del centru a les 12h, onde l’autora va tar acompañada de Marisa Valle Roso, un tríu de cuerda y dos profesores collaboradores. Ellí, la cantante tamién va falar sobre ‘Cenicientes del carbón’, el so últimu llanzamientu, y el so próximu álbum.
La investigación d’Elba Rodal esplora les conexones ente la música popular urbana y l’académica porque, según declara ella mesma: «Ehí ye onde tenemos que tar. Tenemos que ser conscientes de lo qu’hai na cai y nun testerar tanto colo académico». El proyectu surdió va dos años, cuando la orquesta OCAS-y encargó una orquestación de la ‘La Llorona’ pa qu’interpretara Marisa Valle Roso. Anguaño presenta’l resultáu d’un llabor complexu y perinteresante d’adaptación de dellos cantares de Lo Fugaz (2022) pa orquesta, agrupaciones de cámara o grupu de percusión, dependiendo de les característiques y personalidaes de cada cantar.
Carlota Carrera (violín), Daniel Iglesias (viola) y Sofía Soto (violonchelu) van interpretar mañana xunto a Marisa Valle Roso l’arreglu pa tríu de cámara y voz del tema ‘Títere o Esclava’. Trátase d’un cantar sobre la violencia machista que, orixinalmente, tien un acompañamientu de pianu con coros y dalgún toque de percusión. La versión orquestada pa tríu de cuerda d’Elba Rodal algama una atmósfera más íntima y solemne al traviés d’un cambiu de tempo y les propies característiques téniques y sonores de los instrumentos. La compositora y investigadora decidió amestar tamién delles rítmiques asociaes a dances como’l tangu, l’habanera y el pasudoble.
Suscríbite a les nuestres novedaes
