Yá ta convocada una nueva edición de FestiAMAS, el concursu de bandes venceyáu a los premios AMAS que tien como premiu un conciertu con un caché de 1.000 euros; la grabación d’un álbum -con 50 hores de grabación nun estudiu, 30 hores de mestura y masterización-; la edición dixital y física con 450 copies en CD-; y difusión pela TPA. Pa participar namás hai que mandar, enantes del 8 de mayu, una semeya del proyectu musical, dos temes orixinales en formatu mp3 y un teléfonu de contactu al corréu amas@premiosamas.com.
FestiAMAS lleva faciéndose 13 ediciones y esti añu les semifinales -qu’inclúin actuaciones en vivo de los grupos o artistes clasificaos- van facese en Mieres, Llaviana, Castrillón, Llanes, Pravia, Valdés y Cangas del Narcea. La final ye, como tolos años, en setiembre n’Uviéu, dientro de la programación de les fiestes de San Mateo. La TPA fai una retresmisión completa de les semifinales y de la final.
El pasáu añu inscribiéronse 194 proyectos musicales, faciendo d’esti ún de los concursos musicales con más sonadía del país. Les bases completes pa poder participar nél tán publicaes na web de los Premios AMAS.
Suscríbite a les nuestres novedaes
