Desaniciu ye ún de los nomes de la escena de rock en llingua asturiana. Formáu en setiembre de 2019 y dempués del so primer álbum Tapecer de Mio, el grupu asoleya agora un single nuevu, ‘Pena‘, grabáu nos Breakdown Studios de Xixón y producíu por Neftalí Vázquez. Amás, toquen güei, xueves 2 de xineru a les 20h nel Bola 8 de Cimavilla (Xixón).
La portada del cantar nuevu, que yá ta disponible en toles plataformes musicales, ye una semeya d’Ana G. García pa representar la lletra, que «fala d’esos momentos nos que nun sabes quién yes nin qué faes equí», desplica la banda. Desaniciu reivindiquen, amás, que «’Pena’ ye un manifiestu a favor d’unx mesmx, como Walt Whitman, pero intentando visibilizar que la salú mental ye dalgo perimportante nestos tiempos d’inmediatez que capitaliza yá hasta les emociones».
«Desaniciu tocamos poco por trabayu y distancies. Agora tamos componiendo más temes pa dir sacándolos a poquitinos. Primamos siguir sintiendo lo que cantamos y cuntamos frente a agotanos y falar de coses que nun importen», comenta’l grupu crust sobre los sos próximos pasos. Mentanto, toca esfrutar del so cantar nuevu y del conciertu que dan esta tarde xunto a Infección, Tygers of Wrath y Dentellada.
Suscríbite a les nuestres novedaes
