La Banda Gaites Fonte Fuécara despidió, coincidiendo col estrenu del so discu Gaiteros, a quien foi’l so director durante más de venti años, Rodrigo Molinos. «Zarro una etapa perimportante de la mio vida, llevo na banda 30 años y ye momentu de descansar. Amás, nun tengo la suerte de poder dedicame a la música de manera profesional y el mio trabayu impídeme destina-y a la banda tol tiempu que merez», confiesa’l gaiteru. Fabián Fernández, que yá lleva unos años compartiendo les funciones con él, garra’l testigu de la buelga que dexa col so llabor.
Rodrigo Molinos toca la gaita dende los 10 años y dexa agora Fonte Fuécara, la banda na que desarrolló gran parte de la so vida musical y personal. Nestes dos décades quixo caltener les característiques que faen única a la formación dende que Pedro Pangua -el so maestru-, la fundó: «la banda formóse col oxetivu d’esfrutar, difundir y protexer el folclor asturianu. Nes actuaciones xuntamos la música y el baille tradicional cola intención d’ufrir un espectáculu entreteníu. Amás, facemos un llabor de divulgación de la indumentaria tradicional al nun vistir toos uniformaos. Otra característica que define a la banda ye la utilización de tambores asturianos porque confiamos dafechu nes sos posibilidaes», comenta.
Sobre los proyectos d’estos años de dedicación a Fonte Fuécara, cree que los más ilusionantes foron la grabación de los discos, destacando tamién los conciertos n’escenarios importantes de festivales bretones como Lorient o Guingamp. Caltener y Gaiteros son los dos trabayos discográficos qu’asoleyaron baxo la so dirección y tocante a ello, recuerda que «los dos foron importantes y marcáronme dambos. Caltener porque yera la primer vez que desendolcaba un proyectu d’esa envergadura y Gaiteros porque yera’l broche a la mio etapa como director. Quiciabes Gaiteros foi un retu mayor polo que se dilató nel tiempu cola perda d’Elías -productor del discu- y la pandemia, que fizo que tardáremos más de lo previsto».
Les aportaciones de «Rodri» a Fonte Fuécara foron abondes mesmo no humano como no musical. «Dende qu’asumí la dirección, la mio intención yera siguir tresmitiendo la filosofía y los valores que definen a la banda, calteniendo l’estilu que nos caracteriza. Los comentarios y valoraciones del últimu discu que me ficieron llegar directores d’otres bandes y músicos fáenme pensar que lo conseguí. El propiu Pedro Pangua, fundador y primer director, dempués de sentir xuntos el discu na so casa, díxome: «sigue siendo la mio Fonte Fuécara». Espero tener tao al altor y tener aportao’l mio granín d’arena pa que la banda siguiera medrando ensin perder la esencia Fonte Fuécara», desplica.
Suscríbite a les nuestres novedaes
