Dixebra participa na inauguración de la esposición de Naval Xixón en Clicks esti martes 24
Del martes 24 al xueves 26 la Sidrería Canteli de Xixón va acoyer una esposición, como nun se viera enantes, n’alcordanza de la llucha de Naval Xixón. Una montonera Clicks -figurines al estilu Playmobil– van dan forma a un diorama que recrea momentos del conflictu del astilleru xixonés. Pa inaugurar la esposición a les 20h, va tar convidáu Xune Elipe, cantante y fundador de Dixebra, que va falar d’Ente la niebla, l’últimu trabayu de la mítica banda de rock astur que ta dedicáu a la memoria de les clases populares y obreres asturianes del últimu sieglu. Aprovechando la ocasión van sonar dalgunos cantares d’esti llibru-CD, que tamién va poder mercase esti martes xunto al merchandising oficial del grupu.
Temes como “El Natahoyo”, centráu na llucha de Naval Xixón, formen parte d’Ente la niebla, un discu nel que la llucha obrera xixonesa tamién tien protagonismu n’otres pieces como “Ike”. Ye por esta razón -y por crear vieyos himnos como “Dime como ye”, l’irónicu cantar tamién dedicáu al tolete de Mejuto, ún de los policíes que reprimía a los trabayadores del astilleru- polo que dende la Sidrería Canteli quixeron cuntar con representación dixebriega pa da-y más conteníu a la inauguración de la esposición.
El pasáu 22 d’abril asoleyó Ente la niebla, la obra más ambiciosa de Dixebra. Venti cantares y un llibru de 112 páxines dan forma a esti trabayu nel que la diversidá de soníos –rock, reggae, punk ska, folk, funk, metal….- de la música tien el puntu d’alcuentru nunes lletres que comparten conceptu: homenaxear al pasáu, presente y futuru de les clases populares asturianes.
Como dixo la propia banda: «La memoria colectiva de les clases populares asturianes ye una historia de compromisu, llucha y sacrificiu qu’abarcó tol sieglu XX, pero que col posmodernismu y la globalización capitalista foi amatagando nesti mileniu nuevu. Sicasí, hai esperanza, pente la niebla tovía pueden albidrase solombres que nos recuerden quién fuimos y tán dispuestes a facese lluz». Esti mensaxe resume perfectamente la esencia d’esti trabayu enllenu d’historia, señaldá y, a la par, enfotu. Nun ye casualidá pa un grupu que nació cola reconversión industrial y lleva 35 años cantándo-y a la llucha obrera, a la solidaridá, a un país; a una parte de la nuestra identidá como asturianes y asturianos que, pesie a tol desmantelamientu d’Asturies y tola individualización de la sociedá, entá se resiste a morrer. Por eso, nuna esposición como esta de Clicks sobre Naval Xixón y en toa actividá dedicada a la memoria de les lluches obreres, tien xacíu que Dixebra tenga participación; porque punxeron banda sonora rockera a milenta lluches.
