Queden menos de dos meses pa que la canción asturiana vuelva tener ganadores nel so concursu más importante: el Premiu Obdulia Álvarez ‘La Busdonga’ d’Asturianada. El vienres 28 de payares a les 19h, el Teatru de La Llaboral de Xixón va acoyer la gala final d’esti certame entamáu pol gobiernu asturianu; pero enantes va haber trés semifinales en Mieres, Villaviciosa y Uviéu.
La primer semifinal va ser esti domingu 5 d’ochobre a les 12h nel Auditoriu Teodoro Cuesta de Mieres del Camín. Nél van actuar Cristina Sánchez y María Luisa Martínez na categoría femenina; Isaac Sierra y Valentín García na categoría masculina; y Jairo Pérez y Bárbara Riesco na categoría moza.
La siguiente semifinal ye’l domingu 19 d’ochobre, tamién a les 12h, nel Teatru Riera de Villaviciosa. Ellí les actuaciones van ser les de Lorena Corripio y Maribel Morán na estaya femenina; Esteban Verdeja y Manuel Roza na estaya masculina; y Lucía Fernández y Néstor Díaz na estaya moza.
El Teatru Filarmónica d’Uviéu va acoyer la última de les semifinales a les doce’l mediudía del 26 d’ochobre. Nesta ocasión van actuar Alicia Villanueva y María Latores na categoría femenina; César González y Raúl Díaz na categoría masculina; y Marina Carbajosa y Mario González na categoría moza.
La Conseyería de Cultura, Política Llingüística y Deporte creó en 2024 el Premiu Obdulia Álvarez ‘La Busdonga’ d’Asturianada, una reconocencia destinada a promover y difundir la canción asturiana, una de les manifestaciones culturales más significatives del país que se declaró Bien d’Interés Cultural de calter inmaterial nel 2015.
El certame organízase en tres categoríes: femenina, premiada con 6.000 €; masculina, 6.000 €; y moza, con 3.000 €. Pueden presentase toles persones que quedaren seleccionaes ente les seis meyores clasificaes de los concursos llocales «Ciudá de Llangréu», «Ciudad de Oviedo», «Conceyu Siero», «El Comercio», «Valle del Narcea», «Valles d’Ayer» o «Villa de la Avellana».
Con esti premiu, el gobiernu asturianu busca reconocer y valorar «la tradición tan rica de l’asturianada y el llabor d’aquelles persones que caltienen viva esta forma d’arte», amás de «fomentar l’usu de la llingua asturiana, promoviendo la so normalización y espardimientu al traviés de la música». D’esta forma, el xuráu va evaluar el desempeñu de les persones cantantes teniendo en cuenta criterios como la conducta y actitú escénica, la entonación y afinación, la calidá d’emisión y dicción vocal, la ornamentación y matización; la dificultá y variedá d’estilos y la calidá llingüística. La primer edición ganáronla Lorena Corripio (categoría femenina), Carlos Velasco (masculina) y Marina Carbajosa (moza).
Na semeya, actuación de gaita y tambor de Silvia Mallo y Ramón García na gala final del pasáu añu.
Suscríbite a les nuestres novedaes
