El pasáu sábadu 13 d’avientu presentóse, a la fin, 20 años, l’esperáu discu de la mítica banda asturiana de ska, Skama la Rede, que güei yá pue sentise en toles plataformes musicales. Eso sí, nun foi una presentación al usu ―ye dicir, nun foi un conciertu―, sinón que foi un alcuentru informal con dellos componentes del grupu na llibrería uvieína Matadero Uno nel que s’amosó, al igual que cuando tán enriba los escenarios, una conexón y una camaradería col públicu que namás reafirmen la so afitada trayectoria y el futuru perclaru que ta por venir.
«Un llibru de formatu curtiu qu’amás d’incluyir lletres y semeyes inclúi recortes de periódicos, entraes de conciertos, dellos artículos, y munchu material que conforma la hestoria de 22 años de carrera musical»
Faltaba una hora pa qu’entamara l’eventu cuando Fer, Edu, Fonso, Burilo y Llou entraben pela puerta de la llibrería cargaos d’una montonera de caxes tovía calientes. Esa mesma selmana llegaren de fábrica los discos y tamién los llibretos, que lloñe de ser un llibretu tradicional ye, en realidá, un llibru de formatu curtiu qu’amás d’incluyir lletres y semeyes inclúi recortes de periódicos, entraes de conciertos, dellos artículos de los que depués falaremos, y munchu material que conforma la hestoria de 22 años de carrera musical. Que nun seya un llibretu tradicional implicó que la fabricación de dambos productos nun fuere conxunta, polo qu’el grupu llevaba tola selmana metiendo ún a ún tolos llibros na carpeta del discu, embolsándolos con munchu procuru, axuntándolos en caxes de doce y pesllándoles a la fin. Cargaos hasta arriba, subieron les escaleres diciendo: «A saber si vien dalguien a esto güei».
Si bien nun yera un formatu al que Skama la Rede nos tuviera avezaos, a la so llamada tol mundu respuende y poco antes de les siete varies decentes de persones enllenaben yá la sala. «Cómo vamos dexar de tocar, si ye que seguís viniendo», bromeó Burilo antes d’entamar. La charra, que se retrasó dellos minutos porque faltaba’l gaiteru por venir, arrancó sobre les siete y cuartu cuando recibieron el whatsapp de Xandru qu’indicaba que perdiera l’ALSA. «Pierde l’autobús como pierde la gaita», rio’l públicu.
«La charra, que se retrasó dellos minutos porque faltaba’l gaiteru por venir, arrancó sobre les siete y cuartu cuando recibieron el whatsapp de Xandru qu’indicaba que perdiera l’ALSA»
L’actu, que tuvo introducíu por mí, dio-y voz en primer llugar a Burilo, que desplicó a la xente qué diben encontrar nesti trabayu tan especial y por qué ve la lluz a finales de 2025. Asoléyase esti discu tituláu 20 años exactamente a los 22. «Cuando acabé de grabar les voces díxome la muyer que diba ser padre, güei les mios fíes tienen catorce meses». Y ye que la grabación y mezcla d’estos ocho temes ―cuatro d’ellos yá conocíos, pero grabaos coles collaboraciones d’Escuela de Odio, Mala Reputación, Los Berrones, Misiva y Ochobre―, y otros cuatro nuevos―foi en tiempu pa qu’el discu saliera como taba previsto en 2023. Pero’l trabayu del llibretu, los artículos de los collaboradores, los tiempos d’Alfonso Zapico ―autor de tola llinia de diseños y maquetador del llibru― y dellos problemes coles fabriques ficieron qu’esta fiesta de cumpleaños tuviere que retrasase. Pero tolo bueno se fai esperar y el resultáu impecable d’esti trabayu perdóna-yos la tardanza.
Depués de Burilo falar del conteníu del discu y del procesu de producción, llegó la parte más sentimental del alcuentru. Afrontar dos décades d’hestoria ye recordar munchos momentos, y por suerte toos ellos son gratificantes pa la banda. Caún de los cinco foi cuntando cuáles fueron los conciertos más especiales pa ellos, y salieron anécdotes entós n’Alemania, n’Italia, en Lisboa, per tola xeografía del estáu español y, cómo non, en munchísimos conciertos n’Asturies, dende la CNT de Xixón, a un conciertu montaos nun camión nuna manifestación pola oficialidá, un Kuivi con mil persones o les mítiques fiestes de Migalpiri, a onde se llega en tractor. El llionés de la banda, Edu, desplicó ente rises cómo cuando entamó’l proyectu él nun veía nada claro lo del asturianu, y cómo los años-yos fueron demostrando que yera l’asturianu, precisamente, el que-yos taba abriendo toes eses puertes. Y ye que nestos tiempos de globalización xabaz y despersonalización absoluta, les idiosincrasies de los pueblos son maxa, riqueza, y ponte ente naciones.
«Los años-yos fueron demostrando que yera l’asturianu, precisamente, el que-yos taba abriendo toes eses puertes. Y ye que nestos tiempos de globalización xabaz y despersonalización absoluta, les idiosincrasies de los pueblos son maxa, riqueza, y ponte ente naciones»
D’ehí que nesti llibru, al qu’agora aportamos, atopemos non solo testos n’asturianu (Xicu Ariza, Xune Elipe, David Artime y Natalia González, servidora), sinón tamién en gallegu (Gabri Reigosa, de Dakidarría) y en portugués (Nuno Feliz, fotógrafu del Festival de la Mázcara Ibérica de Lisboa, onde Skama la Rede tocó tres veces).
Pa falar del llibru y del diseñu de portada sentóse cola banda Alfonso Zapico. L’autor de la imaxe d’esti 20 años desplicó cómo l’oxetivu principal del so trabayu yera la non intervención, respetar l’estilu de la banda y axuntar tolos sos materiales ensin que quedara buelga del so propiu estilu nel procesu. El collage del discu, caóticu, recuerda a la mesma carpeta qu’él recibió colos materiales, y fai que les lletres de los temes tean integraes como un recorte más o que los artículos de los distintos autores paezan una noticia de 2007. Dende fuera ―humildá de Zapico aparte― el trabayu de composición d’estes páxines ye absolutamente impolutu y amuesa un procuru y una orixinalidá a l’altura de tolos trabayos del diseñador. Depués faló de la portada, na que pue vese un megáfonu y a la so sombra, debaxo, el nome de la banda y del discu. Esa pieza única y central foi impresa en 3D y fotografiada llueu pol autor.
«El collage del discu, caóticu, recuerda a la mesma carpeta que’l diseñador Alfonso Zapico recibió colos materiales, y fai que les lletres de los temes tean integraes como un recorte más o que los artículos de los distintos autores paezan una noticia de 2007. El trabayu de composición d’estes páxines ye absolutamente impolutu y amuesa procuru y orixinalidá»
Y llegando al final d’el actu, delles persones del públicu s’animaron a contar les sos anécdotes, ente ellos Iyán González comentó, ente rises, cómo Skama la Rede nunca facía merchan y cuando entamaben los chavales a escuchalos fai dos décades, teníen que facer ellos mesmos les sudaderes. Burilo, pa poner el ramu, cuntó como nun festival en Galicia al que fueron un puestu a la puerta vendía chapes de Skama la Rede. Tolos miembros de la banda fueron a comprales. «Pero vamos a ver, ¿Eskorbuto facía camisetes? Pues nosotros tampoco». Sicasí, anque la banda defienda’l caos que los caracteriza, yá por fin tienen camisetes y podéis facevos con elles nos conciertos a los que s’alcuerden de llevales. El próximu añu, amás d’un conciertu de presentación, atoparemos a los de Lluanco nuna bona montonera de festivales asturianos. Y quién sabe si tamién responderán al llamáu d’Ochobre pa presentar xuntos dambos discos en Madrid.
Pa rematar la fiesta, proyectóse’l videoclip ‘Al debalu’, ún de los temes nuevos que vio la lluz fai unes selmanes y nel que participa Pirri, d’Escuela de Odio. Sentaos na llibrería, dalgunos poniéndose yá de pie, foi inevitable qu’entamaren a movese les rodielles. Y ye que Skama en nenguna ocasión dexó a la xente ensin baillar. Burilo nun quiso terminar ensin recordar, viendo’l videu, que’l soníu únicu de la banda y la calidá de toles grabaciones fueron siempre obra de Sergio Rodríguez.
Cola última nota de ‘Al debalu’, Java Sánchez, técnicu habitual de la banda, apaeció na sala con una tarta y dos veles enriba: 22. Rises, aplausos, cerveces y chocolate mientres decenes de persones facíen cola pa que los artistes-yos firmaren los discos. La resaca yá vendrá.
Suscríbite a les nuestres novedaes
